Бу ҳақда Таълим ва илм-фан вазирлиги маълум қилди.
Қайд этилишича, Ғиждувон туманидаги 64-мактаб директори Насиба Туропова маоши кечикаётгани сабабли вазирликка мурожаат қилган. Унинг айтишича, туман мактабгача ва мактаб таълими бўлими бош ҳисобчисига мурожаат қилганида, тўловлар Мажбурий ижро бюроси томонидан ҳисоб рақами ёпиб қўйилгани сабабли амалга ошмаётгани айтилган.
«Ойлик иш ҳақимиз қачон берилишини сўраганимда, ҳисоб рақами ёпиб қўйилганини айтишди. Шунинг учун амалий ёрдам сўраб, вазирликка ўзим мурожаат қилдим. Ойлигимдан икки нафар фарзандимнинг контракт тўловларини қиламан, кичик ўғлимнинг курс пулини ҳам тўлаб тураман. Ойликлар ўз вақтида берилишини хоҳлайман», — дейди мурожаатчи.
Вазирлик томонидан ўтказилган ўрганишда муаммонинг сабаби аниқланган. Маълум бўлишича, тумандаги 69 та мактаб ва 78 та давлат мактабгача таълим ташкилотининг учинчи чорак ҳисоботи 15 октябрга қадар топширилиши керак бўлган. Бироқ белгиланган муддатга риоя қилинмагани оқибатида UzASBO тизими тўловларни автоматик равишда тўхтатган.
Ўрганиш натижаларига кўра, муаммо 23-, 42- ва 62-сонли давлат мактабгача таълим ташкилотлари директорлари томонидан маълумотларни ўз вақтида тизимга киритилмагани ва йўл қўйилган хатолар тузатилмагани билан боғлиқ бўлган.
Масъуллардан бирининг таъкидлашича, одатда 78 та давлат мактабгача таълим ташкилотидаги ходимларнинг иш ҳақи ойнинг иккинчи санасига қадар тўлиқ тўлаб бериб келинган. Бу сафар эса уч нафар директорнинг масъулиятсизлиги сабабли тўловлар кечиккан.
Ҳолат вазирлик ва молия органлари ҳамкорлигида бартараф этилган. Масъулиятсизликка йўл қўйгани учун Ғиждувон туманидаги 23-, 42- ва 62-сонли давлат мактабгача таълим ташкилотлари директорлари, шунингдек, туман марказлаштирилган молия-бухгалтерия хизмати раҳбари Шерзод Шарифов билан тузилган меҳнат шартномалари бекор қилинган. Бундан ташқари, яна икки нафар масъул ходимга нисбатан интизомий жазо чоралари қўлланилган.
Муаммо бартараф этилганидан сўнг мактабларнинг ҳисоб рақамлари очилган ва ўқитувчиларга иш ҳақи тўлаб берилган.
