Қор қоплони йўқ бўлиб кетиш арафасида турган, локал тарқалган тур сифатида Ўзбекистон Қизил китоби, Табиатни муҳофаза қилиш халқаро иттифоқи Қизил рўйхати ҳамда CИТEСнинг I Иловасига киритилган. Қор қоплони Ғарбий Тян-Шан (Угом, Писком ва Чотқол тизмалари), Ғарбий Помир-Олой (Туркистон, Зарафшон ва Ҳисор тизмалари)да тарқалган. Тоғларнинг ўрта ва юқори қисмида яшайди, оқшомда фаол, кундузи ғорларга, қоялар орасига беркиниб ётади. Тоғ бўйлаб ёввойи туёқлилар ортидан юқорига ва пастга мавсумий кўчиб юради. 21 йилгача яшайди.
Ўзбекистон қор қоплонини муҳофаза қилиш борасида халқаро миқёсда фаол ҳамкорлик олиб бормоқда. Мамлакат қор қоплони тарқалган 12 давлатни бирлаштирувчи ГСЛEП дастурининг фаол аъзоси ҳисобланади. 2025 йилда Қирғизистоннинг Чўлпонота шаҳрида ГСЛEП Бошқарув қўмитасининг 9-йиғилишида қор қоплони ва тоғ экотизимларини муҳофаза қилиш бўйича Чўлпонота резолюцияси қабул қилинди.
Қолаверса, Самарқандда бўлиб ўтган CМС CОП14 доирасида Самарқанд резолюцияси қабул қилиниб, қор қоплонини муҳофаза қилиш бўйича халқаро ҳамкорлик янада кучайтирилди. Умуман олганда, Ўзбекистон қор қоплонини муҳофаза қилишда халқаро ташкилотлар, қўшни давлатлар ва илмий муассасалар билан ҳамкорликни кенгайтириш, замонавий мониторинг технологияларини жорий этиш ҳамда трансчегаравий тоғ экотизимларини биргаликда асрашга алоҳида эътибор қаратмоқда.
Маълумот учун, “Ҳисор” давлат қўриқхонаси 1983 йилда Қашқадарё вилоятида ташкил этилган.
Қўриқхона 4 та бўлимдан иборат бўлиб, ҳудудда умуртқасиз (ҳашаротлар) ва умуртқали ҳайвонларнинг 276 тури учраши аниқланган. Шулардан 17 тури Ўзбекистон “Қизил китоб”ига киритилган.
