Албатта, Муҳтарам Президентимизнинг халқ учун яратаётган имкониятлари инсон қадрини юксалтиришга хизмат қилмоқда. Инсон қадри юксалган жойда келажак парлоқ бўлади. Ҳар бир қадамда юксалиш, ривожланиш, қурилиш ва ободонлаштириш жараёнлари авж олган. 

Энг муҳими, ҳудуд иқтисодиётида янги саноат корхоналари ва замонавий технологиялар кириб келмоқда. Маҳаллий хомашёни чуқур қайта ишлаш, тайёр маҳсулот ишлаб чиқариш, экспорт географиясини кенгайтириш ва яшил энергетикани ривожлантиришда Қорақалпоғистон саноатининг янги қиёфасини шакллантирмоқда. Шу маънода бугунги бунёдкорлик ишлари нафақат ҳозирги иқтисодий эҳтиёжларга, балки ҳудуднинг узоқ муддатли тараққиёти учун хизмат қилади.

Мустақиллигимизнинг 35 йиллигини тантанали нишонлаш жаарёнида Қорақалпоғистонда жами 12 объект, шунинг ичида 117 миллиард сўм маблағ ҳисобидан янгидан реконструкция қилинган Турон футбол стадиони, 3,1 триллион сўмлик 200 мегаваттли шамол электр станцияси ва 100 мегаваттли энергия сақлаш тизими, 153 миллиард сўмлик Қорақалпоғистон илмий-амалий тиббиёт академияси, 12 миллион долларлик оҳак ишлаб чиқариш заводи, халқаро молия институтлари томонидан молиялаштирилиб, 167,7 миллиард сўм ҳисобидан реконструкция қилинган Манғит сув тозалаш иншооти, Нукус шаҳрида 15 миллион долларлик газоблок ишлаб чиқариш корхонаси, Кегейлида 4 миллион долларлик ДВП маҳсулотларини ишлаб чиқаришни ташкил этиш лойиҳаси каби объектлар ишга туширилди. Албатта, ушбу йирик лойиҳалар муҳтарам Президентимизнинг одилона сиёсати, бошқа давлатлар билан яхши муносабатта бўлиши натижасида амалга оширилмоқда. Инвестициялар аҳолиси тинч, халқи меҳнаткаш Ўзбекистонимизга, шу жумладан Қорақалпоғистонимизга кириб келмоқда.

Шунингдек, Нукус тумани ҳудудида 60 миллиард сўмлик паррандачилик комплекси, Буюк Британиянинг 3,3 миллиард сўмлик Pearson Btec халқаро таълим дастури лойиҳаси, Нукус шаҳрида 21 миллиард сўмлик замонавий хусусий мактаб, Тахиатош туманидаги 8,5 миллиард сўм ҳисобидан янгидан қурилган 23-сонли умумтаълим мактаби, Чимбой туманида 13,4 миллиард сўмлик янги мактабгача таълим ташкилоти фойдаланишга топширилиши сўзимизнинг исботи.

Ўзбекистон Республикаси Президенти бошчилигида энергетика соҳаси, жумладан, қайта тикланувчи энергия йўналишига хорижий инвестицияларнинг фаол жалб қилиниши, ишлаб чиқариш қувватлари сонини кенгайтирмоқда. Нукус 2 — Осиё тараққиёт банкининг қуввати 200 мегаватт бўлган йирик шамол энергетикаси лойиҳаларидан бири ҳисобланади.

Қораўзак туманида қуввати 200 мегаватт бўлган замонавий шамол электр станцияси ишга туширилди. Янги объектнинг аҳамиятини унинг ишлаб чиқариш қуввати ва йиллик кўрсаткичлари ҳам яққол намоён этади. Станция тўлиқ қувватда ишлаганда йилига қарийб 701 миллион киловатт-соат электр энергияси ишлаб чиқаради. Бу қарийб 292 минг хонадоннинг 1 йиллик электр энергияси истеъмолига тенг. Эътиборли жиҳати, мажмуада 100 мегаватт қувватга эга энергия сақлаш тизими ҳам барпо этилган. Зеро, шамолнинг тезлиги доимо бир хил эмас. Энергия сақлаш тизими эса ишлаб чиқариладиган электр энергиясини захиралаш ва зарурат туғилганда тармоққа узатиш орқали электр таъминоти барқарорлигини таъминлашга хизмат қилади.

Муҳтарам Президентимизнинг «Бизнинг олий ва эзгу мақсадимиз – биргаликдаги фидокорона меҳнатимиз билан Янги Ўзбекистон таркибида Янги Қорақалпоғистонни бунёд этишдир» деган даъвати Қорақалпоғистон аҳлини янги марралар сари чорлайди, ҳар биримизда Ватанга хизмат қилиш масъулияти ва фахрини янада оширади.       

Ҳурматли Президентимизнинг Қорақалпоғистонга ташрифи худуднинг иқтисодий ва ижтимоий салоҳиятини янада ошириб, янги имкониятлар яратиб беради. Энг муҳими инсонлар ҳаётини яхшилашга хизмат қилади.

Қонақбай ТУРДЫБАЕВ,

Қорақалпоқ давлат университети профессори,

филология фанлари доктори.