Депутатлар ташаббуси билан ишлаб чиқилган ҳужжат фуқароларни яшаш ва турган жойи бўйича рўйхатдан ўтказиш жараёнини соддалаштиришга қаратилган.

Лойиҳада, хусусан, эр-хотин, ота-она ва фарзандлар, бува-буви ва набиралар, ака-ука ҳамда опа-сингилларни бир-бирининг уй-жойига рўйхатдан ўтказишда хонадон майдони белгиланган ижтимоий меъёрдан кам бўлса ҳам, бу ҳолат рўйхатдан ўтишга тўсқинлик қилмаслиги белгиланмоқда.

Шунингдек, талабалар турар жойларида яшаётган талабаларни рўйхатдан ўтказишда ҳам уй-жой майдонининг ижтимоий нормаси қўлланилмаслиги назарда тутилмоқда.

Қонун лойиҳасида ипотека кредити ёки субсидия асосида уй олган фуқаролар учун ҳам енгилликлар кўзда тутилган. Хусусан, уй-жойга тақиқ ёки хатлов қўйилган бўлса, мулкдор ва унинг яқин қариндошларини ушбу манзилга рўйхатдан ўтказиш учун банк, суд ёки Мажбурий ижро бюросининг розилиги талаб этилмаслиги таклиф қилинмоқда.

Бу ўз навбатида фуқароларга фарзандларини мактаб ёки боғчага жойлаштириш, поликлиникага бириктириш, пенсия ва бошқа ижтимоий хизматлардан фойдаланишдаги айрим муаммоларни бартараф этишга хизмат қилиши кутилмоқда.

Бироқ гаровга олувчи ва давлат органларининг қонуний манфаатларини ҳимоя қилиш мақсадида рўйхатдан ўтказилаётган шахснинг олдиндан ёзма розилиги институтини жорий этиш таклиф қилинмоқда. Унга кўра, гаровга олувчи ёки тақиқ (хатлов) қўйган ваколатли орган мурожаати асосида шахснинг рўйхатдан ўтказилганлиги бекор қилиниши мумкин.

Муҳокамаларда депутатлар лойиҳанинг аҳамияти юзасидан фикр ва таклифларини билдирган.

Қонун лойиҳаси Қонунчилик палатаси депутатлари томонидан биринчи ўқишда қабул қилинди.