Мазкур Регламент ижтимоий ходимларга Ижтимоий ҳимоя миллий агентлиги (Агентлик) тизимидаги Ижтимоий ҳимоя тизими ходимларининг малакасини ошириш маркази (ваколатли орган) томонидан малака сертификатини бериш бўйича давлат хизматларини кўрсатиш тартибини белгилайди.
Қарорга кўра, малака сертификати назорат синови натижаларидан келиб чиқиб қуйидаги тартибда берилади:
1 йиллик махсус иш стажига эга талабгорга – III тоифа малака сертификати;
2 йиллик махсус иш стажига эга талабгорга – II тоифа малака сертификати;
3 йиллик махсус иш стажига эга талабгорга – I тоифа малака сертификати.
Талабгордан III тоифали малака сертификатини олиш учун олий маълумот, II ва I тоифали малака сертификатини олиш учун тор доирадаги олий маълумот талаб қилинади.
Малака сертификати 5 йил амал қилиш муддати билан берилади.
Малака сертификатини олиш бўйича назорат синовида иштирок этиши учун талабгор ваколатли органнинг камида 36 академик соатлик ўқув курсларида малака ошириши лозим бўлади.
Малака сертификатини олиш учун назорат синови, қоида тариқасида, ҳар чоракда 1 марта ўтказилади.
Талабгорлар тест ва кейс таҳлили бўйича умумий 100 баллик тизимда баҳоланади.
Назорат синови натижаси бўйича 70 ва ундан юқори балл тўплаган талабгор назорат синовидан ўтган ҳисобланади.
