Бу ҳақда ЙҲХХ бошлиғи Шерзод Ибрагимов «Ўзбекистон 24» телеканалига берган интервьюсида маълум қилди.
Таъкидланишича, вояга етмаганларга транспорт воситасини бошқаришни топшириш, аҳоли пунктларида ноқонуний пойгалар уюштириш ва қўпол қоидабузарликларни мунтазам содир этиш ҳолатлари йўллардаги хавф-хатарларни кескин оширмоқда. Шунингдек, айрим қоидабузарларнинг жаримани чегирма асосида тўлаши уларнинг такроран ҳуқуқбузарлик содир этишига шароит яратаётгани қайд этилган.
Шундан келиб чиқиб, бир қатор янги чораларни жорий этиш таклиф қилинмоқда. Жумладан:
- беш турдаги қўпол қоидабузарлик учун транспорт воситасини вақтинча олиб қўйиш;
- вояга етмаган шахсларга транспорт бошқаришни топширганлик учун алоҳида маъмурий жавобгарлик белгилаш;
- ноқонуний пойга ташкил этиш ва унда иштирок этиш учун жавобгарликни кучайтириш;
- юк автомобилларини тунги вақтда йўл четида ташлаб кетганлик учун алоҳида чоралар кўриш;
- транспорт бошқариш ҳуқуқига эга бўлмаган ёки ушбу ҳуқуқдан маҳрум қилинган шахс томонидан содир этилган йўл безорлиги учун автомашинани мусодара қилиш ёки вақтинча олиб қўйиш;
- маст ҳолда автомобил бошқарганлик учун 15 суткагача маъмурий қамоқ жазосини қўллаш;
- қўпол қоидабузарлик содир этган ҳайдовчиларга нисбатан бир йил давомида жаримани чегирма билан тўлаш имтиёзини татбиқ этмаслик.
Таклифларнинг энг муҳим жиҳатларидан бири — вояга етмаган шахсга транспорт бошқаришни топшириш оқибатида одам жароҳатланса, ҳалок бўлса ёки бошқа оғир оқибатлар юз берса, бундай ҳолатлар учун тўғридан-тўғри жиноий жавобгарлик жорий этилиши назарда тутилмоқда.
Мазкур таклифлар қабул қилинса, йўл ҳаракати хавфсизлигини таъминлаш ва қўпол қоидабузарликларнинг олдини олиш бўйича қонунчиликдаги чоралар сезиларли даражада кучайтирилади.
