Бу борадаги тартиб «Давлат ва нодавлат тиббиёт ташкилотларида Ўзбекистон Республикаси Давлат бюджети маблағлари ҳисобидан тиббий ёрдам кўрсатиш тартиби тўғрисида»ги низомда белгиланган.
1. Аввало оилавий шифокорга мурожаат қилинади
Бемор имтиёзли йўлланма асосида тиббий ёрдам олиш учун ўзи бириктирилган бирламчи тиббий-санитария ёрдами муассасасига мурожаат қилади.
Оилавий шифокор беморни кўрикдан ўтказиб, унинг амбулатор ёки стационар даволанишга эҳтиёжини белгилайди.
Агар стационар даволаниш зарур деб топилса, бемор ДМEД тизими орқали электрон йўлланма асосида туман ёки шаҳар кўп тармоқли марказий поликлиникасидаги тор соҳа мутахассисига йўналтирилади.
2. Текширувлар ўтказилади
Тор соҳа мутахассиси зарур ҳолларда қўшимча лаборатория ва инструментал текширувларни тайинлайди.
Натижаларга кўра беморни шифохонада даволаш зарур деб топилса, тегишли хулоса ва текширув натижалари ДМEД ахборот тизимига киритилади.
Беморнинг имтиёзли тоифага кириши ахборот тизимлари интеграцияси орқали аниқланади. Шундан сўнг унинг ҳужжатлари ҳудуд даражасидаги тиббий танлов комиссиясига юборилади.
3. Қаерда даволаниш белгиланади
Комиссия беморга қандай муолажа зарурлиги ва уни қайси даражадаги тиббиёт муассасасида даволаш мақсадга мувофиқлигини белгилайди.
Яъни бемор туман ёки шаҳар, вилоят ёки республика даражасидаги тиббиёт муассасасида даволаниши бўйича хулоса чиқарилади.
Агар беморни республика даражасида даволаш зарур бўлса, унинг ҳужжатлари ДМEД тизими орқали Республика комиссиясига юборилади. Республика комиссияси даволанишни маъқуллаши ёки беморни ҳудуд даражасида даволаш мумкинлиги ҳақида хулоса бериши мумкин.
4. Бемор тиббиёт муассасасини ўзи танлайди
Республика даражасида даволаниш тасдиқлангач, беморга тиббиёт ташкилотини танлаш ҳуқуқи берилади.
Танлов беморнинг ўзи ёки унинг хоҳишига кўра оилавий шифокор орқали ДМEД тизимида амалга оширилади.
Тизимда беморнинг ташхиси ва зарур тиббий амалиёт бўйича хизмат кўрсатишга рухсат берилган давлат ва нодавлат тиббиёт ташкилотлари рўйхати шаклланади.
Бемор ушбу рўйхатдан ўзига маъқул тиббиёт ташкилотини 30 кун ичида танлаб, йўлланмани тасдиқлаши керак.
5. Электрон навбатга қўйилади
Тиббиёт ташкилоти танлангач, бемор тегишли йўналиш бўйича электрон навбатга қўйилади.
Навбати етганда, йўлланма автоматик равишда тасдиқланади ва тиббиёт ташкилоти беморни хабардор қилади.
Муҳим: бемор йўлланма тасдиқланган кундан бошлаб 10 кун ичида тиббиёт ташкилотига келиши лозим. Акс ҳолда, йўлланма ўз кучини йўқотади ва бемор қайтадан навбатга туришига тўғри келади.
Шундан сўнг беморни даволаш босқичи бошланади.
Даволаш ва ташхислаш белгиланган стандартлар, клиник протоколлар ҳамда тиббий кўрсатмалар асосида амалга оширилади. Юқори технологияли тиббий ёрдам кўрсатишда ҳам белгиланган тартибга риоя қилинади.
Муолажа учун зарур дори воситалари, қимматбаҳо тиббий буюмлар ва бошқа тегишли харажатлар давлат бюджети маблағлари ҳисобидан қопланиши кўзда тутилган. Шу сабабли мазкур даволаниш доирасида бемордан қўшимча тўлов ундирилмайди.
