Бу талаб АҚШ касалликларни назорат қилиш ва олдини олиш марказлари (CDC) томонидан жорий этилмоқда.
Янги тартибга кўра, ҳар бир йўловчи АҚШга учишдан олдинги 21 кун давомида Конго Демократик Республикаси (КДР) ҳудудида бўлмаганини тасдиқловчи қоғоз ёки электрон декларацияни тўлдириши ва имзолаши керак.
Бунда КДР аэропорти орқали транзитдан ўтиш ҳам мамлакат ҳудудида бўлганлик деб ҳисобланади. Ҳатто йўловчи самолётни ёки аэропортни тарк этмаган бўлса ҳам, декларацияни тўлдириши шарт.
18 ёшга тўлмаган йўловчилар учун декларация ота-онаси, васийси ёки бошқа ваколатли шахс томонидан тўлдирилади ва имзоланади.
Декларацияни тақдим этмаган йўловчилар рейсга чиқарилмайди. Шунингдек, била туриб ёлғон маълумот тақдим этиш АҚШ қонунчилигига мувофиқ жиноий жавобгарликка сабаб бўлиши мумкин.
Йўловчиларга талаблар билан олдиндан танишиб чиқиш ва аэропортга келишдан аввал декларацияни тайёрлаб қўйиш тавсия этилмоқда.
Декларация шакли ва қўшимча маълумотлар билан ушбу ҳавола орқали танишиш мумкин.
