Бугун ишга келишдан олдин шу туннелдан ўтишга тўғри келди. Бу ердан ўтиб-қайтувчиларнинг саноғига етиб бўлмайди. Кунига юзлаб тадбиркорлар, минглаб юртдошларимиз, ўнлаб чет эл фуқаролари-туристлар ўтиб-кайтадиган мазкур серқатнов ер ости йўли таъмирталаб бўлганига анча йиллар бўлган. Эҳтимол, барпо бўлганидан бери тайинли қаров кўрмагандир. Нимагадир масъуллар мамлакатимиз ички имиджига таъсир қиладиган бу ишга эътибор қаратмаяпти.
Хоҳлаймизми-йўқми, ўз кўзимиз билан кўрган объект ҳолати кайфиятимиз ўзгаришига туртки беради. Айтмоқчимизки, мазкур ер ости йўлидан ўтадиган одамларнинг назари ҳам беихтиёр туннель деворларининг хунуклиги, бу ерда чиқиндиларнинг тўпланиб қолиши кабиларга тушади. Бу уларга кўтаринкилик бахш этмайди.
Бунёд этилганига 30 йилча бўлган мазкур ер ости йўли қачон таъмирланиши билан боғлиқ саволларимизга жавоб олишга ҳаракат қилдик. Тошкент шаҳар ҳокимлиги вакили объект Ўзбекистон Республикаси Транспорт вазирлиги ҳузуридаги Автомобиль йўллари қўмитасига қарашли эканини маълум қилди. Қўмита масъули эса буни рад этди. Чилонзор тумани ҳокимлиги мутасаддиси масалага ойдинлик киритмади.
Айтишларича, ушбу туннель расман фойдаланишга топширилмаган. Аммо ундан тадбиркорлар ва уларнинг товарларини сотиб олувчи аҳоли фойдаланишини ҳисобга олсак, эҳтимол, ҳудуддаги Чилонзор буюм ва бошқа бозорлар ҳамда йирик савдо мажмуаларига мазкур ер ости йўлини замонавий услубда реконструкция қилиш тавсия этилиши лозим. Зеро, тадбиркор – элга мададкор.
Х. Салимов
