Кўплаб ҳудудларда кўчалар, ер ости ўтиш жойлари ва туннеллар сув остида қолди, йўлларда автомашиналар қолиб кетди. Баъзи ҳудудларда кўчкилар содир бўлди ва дарахтлар ағанаб тушди.
Сариер туманининг Аязага даҳаси сув тошқинидан энг кўп зарар кўрди. У ерда жойлашган уйлар ва офислардан аҳоли эвакуация қилинди.
Кучли ёмғир жамоат транспортида ҳам жиддий муаммоларга сабаб бўлди. Кечки тиғиз пайтда йўл тирбандлиги 89% га етди, деб хабар берди vesti.az.
Истанбулда жами 1277 та сув тошқини ҳолати қайд этилди. Табиий офатлар ва фавқулодда вазиятларни бошқариш бошқармаси (AFAD) ва 112 шошилинч хизматига 2518 та қўнғироқ келиб тушди.
Ёмғир туфайли эртага Истанбул мактабларида дарслар бекор қилинди. Истанбул губернатори Давут Гюль аҳолига ўта зарурат бўлмаганда уйларидан чиқмасликни маслаҳат берди.
Бундан ташқари, соат 21:00 дан бошлаб мотоцикл ҳаракати тақиқланди.
Туркиядаги ўзбекистонликлар ноқулай об-ҳаво сабаб огоҳлантирилди. Истанбул, Ялова ва Кожаели вилоятларида кучли ёмғир ва шамол сабаб сув тошқинлари хавфи юзага келиши мумкин. Ўзбекистонликлардан эҳтиёт чораларига риоя қилиш сўралди.
