Абитуриентларни рўйхатга олиш Ягона интерактив давлат хизматлари портали (my.gov.uz) ҳамда Билим ва малакаларни баҳолаш агентлигининг сайти (my.uzbmb.uz) орқали онлайн тарзда амалга оширилди.
Жорий йилда жами 677 907 нафар абитуриент онлайн рўйхатдан ўтди. Шундан 451 744 нафарини (66,6 %) жорий йил битирувчилари, 226 163 нафари (33,4 фоиз)ни таълим муассасаларини аввалги йилларда тамомлаган фуқаролар ташкил этди.
Абитуриентларнинг 365 196 нафари (53,9 фоиз)ни аёллар (2025-йилда 361 019 нафар), 312 711 нафари (46,1 фоиз)ни эса эркаклар (2025 йилда 310 378) ташкил этади.
Тест синовларида иштирок этадиган абитуриентлар сони 664 609 нафар. Абитуриентларнинг 36 500 (5,4 фоиз) нафари (2025-йилда 39 307) алоҳида иқтидор талаб этиладиган таълим йўналишларига;
10 581 (2025 йилда 10 572) нафари олий ҳарбий таълим муассасаларига ўқишга кириш истагини билдирган.
Рўйхатдан ўтишда абитуриентлар томонидан юкланган халқаро сертификатлар текширилиб, уларнинг 24 526 таси (2025 йилда 18 854 та) тасдиқланди.
Умумтаълим фанлари бўйича 193 186 (2025 йилда 85 140) нафар, чет тиллари бўйича эса 125 354 (2025 йилда 58 216) нафар миллий ёки халқаро сертификатга эга абитуриент рўйхатдан ўтган.
Жорий йилда барча фанлардан миллий ёки халқаро сертификатга эга бўлган 12 997 нафар абитуриент тест синовларидан озод қилиниб, бевосита танлов босқичига ўтказилди (ушбу тоифадаги абитуриентларга "Абитуриент рухсатномаси" шакллантирилмаган). 2025 йилда бундай имкониятдан 678 нафар абитуриент фойдаланган эди.
Жорий йилда тест синовларини сифатли ташкил этиш ва ўтказиш учун бинолар меъёрлаштирилди. Ҳозирда 64 (2025-йилда - 65) та ёпиқ турдаги катта сиғимли бино тест синовларига тайёрланди. Уларда бир сменада 1 183 (2025 йилда - 1 169) та гуруҳда, 35 490 (2025 йилда 35 070) нафар, бир кунда эса 70 980 (2025-йилда 70 140) нафар абитуриент тест синовида иштирок этади.
Тест синовлари 10 кун муддат давомида ўтказилади.
