Абитуриентлар вакант йўналишлар бўйича ўтган йилги ўтиш баллари билан @mandat_javobbot Telegram боти орқали танишишлари мумкин.
Хабарингиз бор, Вазирлар Маҳкамасининг 2026 йил 28 январдаги 32-сонли “Айрим тоифадаги талабаларнинг давлат олий таълим ташкилотлари талабалар турар жойларидаги яшаш харажатларини қоплаб бериш тартиби тўғрисидаги низомни тасдиқлаш ҳақида”ги қарори билан “Олий таълим ташкилотларига ўқишга қабул қилиш жараёнларини тартибга солувчи норматив-ҳуқуқий ҳужжатларни тасдиқлаш тўғрисида”ги 578-сонли қарорга қўшимча ва ўзгартиришлар киритилган.
Унга кўра, кириш имтиҳонларида иштирок этиб, минимал балл тўплаган, бироқ талабаликка тавсия этилмаган абитуриентларга вакант (бўш) ўринлар қолган йўналишларда танловда иштирок этиш имконияти берилади.
Бу жараён қуйидагича амалга оширилади
– имтиҳон натижалари эълон қилингандан сўнг бир ҳафта ўтиб, фанлар мажмуаси ва таълим тили мос бўлган вакант йўналишларга бир ҳафта муддатда рўйхатдан ўтилади;
– абитуриентлар тўплаган баллари кетма-кетлигига (рейтингга) қатъий риоя қилинган ҳолда бўш ўринларга базавий тўлов-контракт асосида қабул қилинади;
– агентлик томонидан шакллантирилган қайдномалар олий таълим ташкилотларига буйруқ расмийлаштириш учун асос бўлади.
Давлат комиссияси баёнига мувофиқ, ўтган ўқув йили учун ҳам бакалавриат таълим йўналишларида вакант қолган ўринларга қўшимча қабул амалга оширилган эди.
Унга кўра, 2025-йилги қабулда кириш имтиҳонларида 56,7 ва ундан юқори балл тўплаган, бироқ талабаликка тавсия этилмаган, шунингдек, иккинчи босқичда ОТМ ва таълим йўналишини танламаган абитуриентларга давлат ОТМларида қолган вакант бакалавриат йўналишлари учун қўшимча танловда иштирок этиш имконияти яратилган эди. Бунинг учун улар 25 сентябрдан 3 октябргача my.uzbmb.uz платформаси орқали онлайн рўйхатдан ўтган. Танловда абитуриентлар фанлар мажмуаси мос бўлган йўналишларни танлаган ҳамда улар тўплаган баллар рейтинги асосида вакант ўринларга базавий тўлов-контракт асосида талабаликка тавсия этилган. Танлов якунлари бўйича қайдномалар 8-октябрга қадар олий таълим муассасаларига қабулни расмийлаштириш учун юборилган эди.
Абитуриентлар вакант ўринлар бўйича ўтган йилги ўтиш баллари билан @mandat_javobbot Telegram боти орқали танишишлари мумкин.
Шунингдек, бот орқали нафақат вакант ўринларга оид маълумотлар, балки қуйидаги қулай хизматлардан ҳам фойдаланиш имконияти яратилган:
– 2025-йилдаги вакант ўринлар бўйича ўтиш баллари;
– ОТМлар кесимидаги ўтиш баллари;
– Имтиёзга эга абитуриентлар учун ўтиш баллари;
– Тўпланган баллга мос йўналишларни аниқлаш;
– SAT-2026 бўйича маълумотлар;
– IQ-тест ва бошқа фойдали хизматлар.
