Унинг таъкидлашича, мураббий сифатида жаҳон чемпионатида иштирок этиш футболчилик фаолиятидан мутлақо фарқ қилади.

— Футболчи сифатида турнирдан кўпроқ завқ оласиз. Мураббий эса доимо жамоа ҳақида ўйлайди, ҳар бир жиҳатни назорат қилишга ҳаракат қилади. Майдон ташқарисида турганингиз учун босим ва масъулият янада катта бўлади, — деди Каннаваро.

Мураббий Колумбияга қарши учрашувдаги асосий сабоқ юқори даражада ҳар бир хатонинг қимматга тушишида эканини таъкидлади.

— Биз яхши ўйнадик, жамоавий ҳаракат қилдик ва интизомли бўлдик. Аммо бундай даражада бир лаҳзалик эътиборсизлик ҳам гол билан жазоланади. Биринчи гол олдидаги вазиятларни узоқ вақт тайёрлагандик, иккинчи гол эса аутдан кейинги хатодан юзага келди. Шунинг учун бундай учрашувларда хатолар сонини кескин камайтириш зарур, — деди у.

Каннаваро иккинчи бўлимдаги ўйиндан мамнунлигини ҳам билдириб, жамоа ўз услубини намоён эта олганини қайд этди.

— Мен футболчиларга доим тўп бизда бўлганда қўрқмасдан ўйнаш, ўзимизга ишониш ва футболдан завқ олиш кераклигини айтаман. Иккинчи бўлимда айнан шундай ўйин кўрсатдик, гол урдик ва яна бир неча хавфли вазиятлар яратдик, — деди мураббий.

Португалия ҳақида гапирган Каннаваро рақиб таркиби жаҳон даражасидаги футболчиларга бой эканини таъкидлади.

— Португалия тўпни назорат қилишни яхши кўради, қисқа узатмалар орқали ўйинни бошқаради ва ҳар бир вазиятда хавфли. Шунинг учун ҳимояда жуда интизомли бўлишимиз керак. Тўп бизда бўлганида эса уларга муаммо туғдиришга ҳаракат қилишимиз лозим. Ҳар бир жамоанинг кучли ва заиф томонлари бўлади. Биз уларнинг кучли жиҳатларини чеклаб, заиф нуқталаридан фойдаланишга интиламиз, — деди у.

Мураббий Криштиану Роналду ҳақида ҳам тўхталиб, унинг буюк футболчи эканини эътироф этди.

— Роналду — катта юлдуз. Аммо ўйин бошланганидан кейин бу ҳақда ўйламаслик керак. Майдонда фақат ўз вазифангизни бажариш ва жамоангиз манфаати учун курашиш муҳим, — деди Каннаваро.

Якунда у Ўзбекистон миллий жамоаси жаҳон чемпионатида жасур ва уюшқоқ жамоа сифатида эсда қолишини исташини билдирди.

— Турнир якунида одамлар Ўзбекистонни илк бор жаҳон чемпионатида иштирок этаётган, лекин кучли рақиблардан қўрқмайдиган, яхши ташкил этилган ва интизомли жамоа сифатида эслаб қолишларини хоҳлайман. Биз барча рақибларни ҳурмат қиламиз ва ўзимизга ҳам шундай муносабат бўлишини истаймиз, — деди Фабио Каннаваро.