Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков ушбу саволларга жавоб берди.
Унинг таъкидлашича, Коксаки вируси энтеровирусларнинг бир тури ҳисобланади. Шу сабабли Ўзбекистонда у алоҳида касаллик сифатида эмас, балки энтеровирус инфекциялари таркибида ҳисобга олиниши мумкин.
Касаллик ўткир ичак инфекцияларига ўхшаш кечади. Айрим ҳолларда нафас йўллари ва ичак билан боғлиқ белгилар бир вақтнинг ўзида кузатилади.
Коксаки вирусининг 70 га яқин тури мавжуд бўлиб, улар орасида асосан А ва В турлари учрайди. Касалланганларнинг аксарияти касалликни енгил ўтказади, ҳатто айримларида унинг белгилари сезилмаслиги ҳам мумкин.
Вируснинг А тури юққанда юз, бурун ва бармоқларда пуфакчалар пайдо бўлиши эҳтимоли бор. В турида эса ичак белгилари, баъзи ҳолларда паренхиматоз аъзоларда ўзгаришлар кузатилиши мумкин.
Гарчи касаллик аксарият ҳолларда енгил кечса-да, айрим ҳолатларда зотилжам ва менингит каби жиддий асоратларни келтириб чиқариши мумкин.
Нурмат Отабековнинг айтишича, касалликка гумон қилинганда беморга симптоматик даво қўлланади. Шунингдек, тўрт кундан ортиқ ёки узоқ муддат давом этган иситма ҳолатларида касаллик эҳтимолини ҳам инобатга олиш мумкин.
Мутахассис ҳозирги вазият ва оммавий ахборот воситаларида тарқалаётган хабарлар юзасидан ортиқча хавотирга ўрин йўқлигини таъкидлади. Унинг қайд этишича, Коксаки вируси Ўзбекистон ҳудудига унчалик хос бўлмаган касаллик бўлиб, асосан Европа ва Лотин Америкаси мамлакатларида, шунингдек, Америка қитъасининг айрим ҳудудларида кўпроқ қайд этилади.
Касалликдан ҳимояланиш учун оддий санитария-гигиена қоидаларига риоя қилиш, қўлларни яхшилаб ювиш муҳим. Агар касаллик белгилари кузатилса, бошқалар билан мулоқотни чеклаш тавсия этилади.
