3000 йиллик тарихга эга ушбу рақс Хоразм заминида яралган бўлиб, тарихий эврилишлар, турли давр силсилаларига қарамай минг йиллар давомида ўз жозибасини сақлаб келмоқда. Шунингдек, 2019 йили ЮНEСКОнинг Жаҳон мероси рўйхатига киритилди.

Президентимиз Шавкат Мирзиёев 2020 йил 28 сентябр куни имзолаган «Лазги» халқаро рақс фестивалини ташкил этиш ва ўтказиш тўғриси”ги қарорига биноан Маданият вазирлиги ташаббуси билан 2022 йилдан эътиборан ҳар икки йилда бир марта — 25–30 апрель кунлари Хоразм вилоятининг Хива шаҳрида “Лазги” халқаро рақс фестивали ўтказиб келинмоқда. 

Маданият вазирлигининг хабар беришича, ЮНЕСКО шафелигида ўтказилаётган “Лазги” халқаро рақс фестивалига бу йилдан бошлаб ТУРКСОЙ халқаро ташкилоти ҳам шафелик қилади.

2026 йили учинчи маротаба ўтказилаётган “Лазги” III халқаро рақс фестивалига дунёнинг 30 дан ортиқ давлатларидан 300 дан зиёд истеъдодли раққосалар, профессионал рақс жамоалари, рақс санъати усталари, мусиқашунос ва санъатшунос олимлар, таниқли санъаткорлар, етук мутахассислар, фахрий меҳмонлар иштирок этади.

Фестивал доирасида бугун, 27 апрель куни, хорижий ва маҳаллий рақс санъати усталари, мусиқашунос ва санъатшунос олимлар, таниқли санъаткорлар ва фахрий меҳмонлар иштирокида “Жаҳон маданий тараққиётида рақс санъати: анъана ва умумбашарий қадриятлар” мавзусидаги III халқаро илмий-амалий конференция ҳам ўз ишини бошлади.

Конференцияда АҚШ, Озарбайжон, Беларусь, Россия, Бразилия, Германия, Ҳиндистон ва шу каби 15 га яқин хорижий давлатлардан келган санъатшунос олимлар, хореография соҳаси мутахассислари ҳамда республикамиз олий ўқув ташкилотлари профессор-ўқитувчилари, илмий изланувчилари, магистрантлар ва талабалар иштирок этди.

Олимлар ва соҳа мутахассислари «Хоразм лазги рақси»нинг «Авесто» билан туташ III минг йиллик тарихини, эстетик-этнографик хусусиятларини ўрганиш, «Лазги» туркуми каби ноёб маданий мероснинг азалий анъаналарини сақлаш ва ривожлантириш, илмий-тадқиқотларнинг инновацион усулларини тавсия этиш каби мавзуларда чиқиш қилди.

Конференцияда кўҳна Хоразм тарихи ҳақида ҳикоя қилувчи «Арда» ҳужжатли фильмининг илк намойиши бўлиб ўтди.


— Лазги рақс фестивалини дўстлик кўприги десак муболаға бўлмайди. Чунки бу яҳши қўшничилик алоқаларини ривожлантираётган тадбирдир. – дейди тадбир иштирокчиси, Қозоғистон Республикаси Ж.Ташенов номли Чимкент университетининг Халқаро ҳамкорлик ва академик мобиллик маркази директори Шаҳло Наралиева. — Лазги саҳнасида ҳар бир миллат ўзининг рақсини намойиш этяпти. Мана бир неча йилдан буён ўтказилиб келинаётган фестивалнинг йил сайин сифати ошиб, географияси кенгайиб бораётганига гувоҳ бўлмоқдамиз. Ўтган йил Чимкент шаҳрида ҳам Лазги рақс танлови ўтказилиб, бунда Қозоғистонлик ҳамда Ўзбекистонлик иштирокчилар қатнашиб, ўз маҳоратини намоён этди. Бу эса ўз ўрнида ушбу асрлар оҳса яшаб келаётган рақс санъат турининг дунёга кенг қулоч ёяётганидан далолатдир.

Конференция 28 апрель куни ҳам давом этади.

Маълумот учун, кечки дастурда Хиванинг «Ичан-Қалъа» мажмуасида «Лазги» III халқаро рақс фестивалининг тантанали очилиш маросими ўтказилади.


Дилнура Қутлимуродова

Yuz.uz  мухбири