Маданият Мўйноқдан бошланади. Мамлакатимиз етакчиси ушбу фикрни янги Ўзбекистонни бунёд этиш борасидаги илк қадамлар ташланган кунларда айтган эди. Қисқа вақт ичида ушбу орзу рўёбга чиқди. Бугун Мўйноқ иқтисодий ўсишга юз тутиб, ижтимоий юксалишга эриша бошлади. Умуман олганда, юртимиздаги олис қишлоқ ва овулларга янгиланишлар нафаси бирдек кириб борди. Буни Қорақалпоғистон мисолида ҳам кўриш мумкин.

Ажиниёз номидаги Нукус давлат педагогика институтида ташкил этилган “Янги Ўзбекистон” ва “Правда Востока” газеталари кунлари доирасидаги тадбирда иштирок этганлар буни яна бир карра эътироф этди.

Тадбирда “Янги Ўзбекистон” ва “Правда Востока” газеталари таҳририяти бош муҳаррири Салим Дониёров, бош муҳаррир ўринбосари Абу Бакир Ўрозов, Республика Маънавият ва маърифат маркази Қорақалпоғистон Республикаси бўлими бошлиғи Татлимурат Атамуратов, Қорақалпоғистон Ёзувчилар уюшмаси раиси Кенесбай Каримов, қорақалпоғистонлик ижодкорлар ва институт профессор-ўқитувчилари, талаба-ёшлар ва оммавий ахборот воситалари вакиллари иштирок этди.

Унда сўзга чиққанлар миллий медиа маконимизда “Янги Ўзбекистон” ва “Правда Востока” газеталарининг ўрни ва аҳамияти ҳақида сўз юритди. Айниқса, таҳририятнинг замонавий талабларни тўла ўрганиб, ўзлаштириб фаолият юритиши эътироф этилди. Жумладан, газеталардаги мақолаларни таҳририятнинг расмий веб-сайти, ижтимоий тармоқлардаги саҳифалари орқали ҳам ўқиш имконияти бор. Бу ёшлар орасида ҳам бугунги сиёсий-ижтимоий воқеалар ҳақидаги теран таҳлилий мақолалар билан танишиб бориш имконини беради. Яна бир муҳим жиҳати, “Янги Ўзбекистон” газетаси мақолаларни Қорақалпоқ тилида ҳам бериб боради. Бу ҳам қорақалпоғистонлик ўқувчилар учун катта имконият экани эътироф этилди.

— “Янги Ўзбекистон” газетасида чоп этилган мақолаларни синчиклаб ўқиб борамиз, — дейди Республика Маънавият ва маърифат маркази Қорақалпоғистон Республикаси бўлими бошлиғи Татлимурат Атамуратов. — Газета саҳифасидаги ҳар бир мақола жонли, содда тилда равон ёзилгани билан ўқувчини ўзига тортади. Бу бизга мамлакатимиздаги ислоҳотларни теран англашимизга кўмак беради. Шу билан бирга янгиланишларнинг оддий одамлар ҳаётида қанчалик ўзгаришларга сабаб бўлаётгани билан ҳам яқиндан танишамиз. Бугун мана шундай нуфузли таҳририят бош муҳарири ижодий жамоаси билан келиб, биз ўқувчилар билан фикр алмашиши бизни беҳад севинтирди.

Худди шундай учрашув Мўйноқ туманидаги 2-сонли болалар мусиқа ва санъат мактабида ҳам бўлиб ўтди. Унда юртимизнинг энг чекка туманида яшаб ижод қилаётган ижодкорлар, мўйноқлик ўқитувчи ва ўқувчилар иштирок этди.

Тадбирда сўзга чиққанлар сўнгги йилларда Мўйноқдаги туб ислоҳотлар ҳақида фикр юритди. Шунингдек, ушбу ўзгаришларнинг “Янги Ўзбекистон” ва “Правда Востока” газеталари таҳририяти жамоаси томонида кенг ёритиб борилаётгани эътироф этилди. Тадбир сўнггида иштирокчилар пойтахтдан келган меҳмонларга ўзини қизиқтирган саволларни бериб жавоб олди.

Минажатдин ҚУТЛИМУРАТОВ,

“Янги Ўзбекистон” мухбири