Олий таълим, фан ва инновациялар вазирлиги маълум қилишича, ҳужжатлар 1 июлдан 30 июлга қадар вазирликнинг my.edu.uz платформаси орқали онлайн қабул қилинади.
Магистратура мутахассисликларига танловда фақат чет тилини билиш даражасини тасдиқловчи миллий ёки халқаро сертификатга эга талабгорлар иштирок этиши мумкин.
Онлайн ариза топшириш учун бакалавр дипломи ҳамда чет тилини билиш сертификати талаб этилади. Мутахассисликлар кесимида қабул қилинадиган чет тили сертификатлари рўйхати вазирлик томонидан эълон қилинган.
Айрим тоифадаги талабгорлардан чет тили сертификати талаб этилмайди. Улар қуйидагилар:
– Президент ва номли давлат стипендиялари соҳиблари, давлат мукофоти совриндорлари ҳамда республика фан олимпиадалари ғолиблари;
– кўриш, эшитиш ёки нутқида нуқсони бўлганлиги тўғрисида ногиронлик маълумотномасига эга шахслар;
– бакалавриат таълим дастурини хорижий тилда тамомлаган битирувчилар.
