2026 йилнинг биринчи чораги якунларига кўра, мурожаатлар индекси энг юқори бўлган тижорат банклари қуйидагича шаклланган:
- Бизнесни ривожлантириш банки – 3,34;
- Anor Bank – 3,29;
- Микрокредитбанк – 3,23;
- AVO Bank – 2,16;
- TBC Bank – 2,06;
- Давр банк – 1,85;
- Tenge Bank – 1,72;
- Асакабанк – 1,26;
- Turon Bank – 1,25;
- Agrobank – 1,22.
Марказий банкнинг таъкидлашича, мижозлар сонига нисбатан мурожаатлар улушининг юқори бўлиши банклар фаолиятида бир қатор тизимли муаммолар мавжудлигини кўрсатади. Хусусан, бу банк маҳсулотлари ва хизматлари бўйича мижозларга етарли тушунтириш берилмаслиги, мурожаатларга ўз вақтида ва сифатли жавоб қайтарилмаслиги, такрорий шикоятларга сабаб бўлаётган камчиликларнинг бартараф этилмагани, масофавий хизматлар, тўловлар, кредитлар ва бошқа банк операциялари билан боғлиқ муаммоларнинг ўз вақтида ҳал этилмаслиги, шунингдек, истеъмолчилар ҳуқуқларини ҳимоя қилиш бўйича ички назорат механизмларини янада такомиллаштириш зарурлигидан далолат беради.
Шу муносабат билан Марказий банк мазкур банкларга мурожаатлар келиб чиқиш сабабларини чуқур таҳлил қилиш, такрорий шикоятларга олиб келаётган омилларни бартараф этиш, мурожаатларни кўриб чиқиш жараёнларини такомиллаштириш, мижозларга хизмат кўрсатиш сифатини ошириш ҳамда ички назорат тизимларини кучайтиришни тавсия қилди.
Марказий банк алоҳида эслатиб ўтишича, мазкур индекс банкларнинг молиявий барқарорлиги ёки ишончлилигини баҳоламайди. У фақат банк мижозлари сонига нисбатан келиб тушган мурожаатлар улушини акс эттиради. Шунингдек, ҳисобот чораги давомида 100 тадан кам мурожаат келиб тушган банклар бўйича индекс ҳисобланмайди ва рейтингга киритилмайди.
