Бу Вазирлар Маҳкамасининг 2026 йил 18 августдаги 447-сон қарорида белгиланди.
Қарор билан ушбу давлат хизматини кўрсатишнинг маъмурий регламенти тасдиқланди. Унга кўра, шахсларни марказларга жойлаштиришда уларнинг ҳуқуқ ва қонуний манфаатларини ҳимоя қилиш, хавфсизлиги ва шахсий маълумотларини муҳофаза қилиш, шунингдек, ижтимоий хизматларни комплекс ташкил этишга устувор аҳамият берилади.
Шу билан бирга, муайян яшаш жойига эга бўлмаган шахсларни аниқлаш, марказга жойлаштириш ва кейинчалик ижтимоий хизматлар билан қамраб олиш жараёни ахборот тизимлари орқали мувофиқлаштирилади.
Хусусан, шахсни идентификация қилиш замонавий технологиялар, жумладан, Face-ID, бармоқ излари ёки фуқаронинг биометрик паспорти ёки ID-картаси орқали амалга оширилади. Шахсга оид маълумотлар «Ягона миллий ижтимоий ҳимоя» ахборот тизимидаги маълумотлар билан солиштирилади.
Марказга жойлаштирилган шахснинг ижтимоий ҳолати ҳам ўрганилади. Бунда унинг ижтимоий ҳимоя чоралари билан таъминланганлиги, хулқ-атвори, моддий ва оилавий ҳолати, қариндошлари ҳамда бошқа шаҳар ва ҳудудлардаги алоқалари аниқланади.
Зарур ҳолларда шахсни оиласи, қариндошлари ёки бошқа яқинлари билан қайта боғлаш чоралари кўрилади.
Қарорда ногиронлиги бўлган шахслар, ёш болали аёллар, ёлғиз кексалар, қаровсиз қолган болалар ва бошқа эҳтиёжманд тоифаларга ижтимоий хизматлар кўрсатиш бўйича ҳам чоралар белгиланган.
Бундан ташқари, шахсларнинг кейинги ижтимоий мослашувини таъминлаш учун индивидуал ижтимоий хизматлар режаси ишлаб чиқилади. Унда ижтимоий муҳофаза чоралари, қариндошлар ва дўстлар билан алоқани тиклаш каби йўналишлардаги тадбирлар назарда тутилади.
Қарорга кўра, 2026 йил 1 октябрдан марказлар фаолиятига оид белгиланган тартиблар амалга киритилади. 2027 йил 1 июлга қадар эса барча марказларни санитария ва қурилиш нормалари ҳамда қоидаларига мувофиқ ҳолатга келтириш белгиланган.
Қарор ижросини назорат қилиш ички ишлар вазири Ж.А. Бобохонов ҳамда Ижтимоий ҳимоя миллий агентлиги директори А.А. Ташкулатов зиммасига юкланган.
