Тезкор тадбирлар давомида мактаб директори лавозимига ишга жойлаштириш ва давлат-хусусий шериклик асосидаги лойиҳаларни келишиш билан боғлиқ қонунбузарликларга чек қўйилди.
Маълум бўлишича, Наманган вилояти Мактабгача ва мактаб таълими бошқармасининг бўлим бошлиғи Тўрақўрғон туманида яшовчи фуқарони Наманган шаҳридаги умумтаълим мактабларидан бирига директор лавозимига ишга жойлаштириб бериш эвазига 10 минг АҚШ доллари талаб қилган.
У талаб қилинган маблағнинг 8,5 минг АҚШ долларини ўз хизмат хонасида олган вақтида ашёвий далиллар билан қўлга олинган.
Тергов маълумотларига кўра, мазкур мансабдор шахс 2011 йилда фирибгарлик, ҳокимият ёки мансаб ваколатини суиистеъмол қилиш, мансаб сохтакорлиги, пора олиш ҳамда ҳужжатлар билан боғлиқ жиноятлар учун судланган бўлишига қарамасдан, яна қонунга хилоф ҳаракат содир этган.
Яна бир ҳолатда Наманган шаҳридаги мактабгача таълим ташкилоти ходими давлат-хусусий шериклик асосида иккита мактабгача таълим муассасаси ташкил этмоқчи бўлган тадбиркорга тегишли шартномаларни тасдиқлатиб беришни ваъда қилиб, 2 минг АҚШ доллари олган вақтида ушланган.
Тезкор тадбирнинг давомида мазкур маблағни олган Давлатобод тумани Мактабгача ва мактаб таълими бўлими бош мутахассисининг ҳам ноқонуний ҳаракатларига чек қўйилган.
Ҳозирда ҳар икки ҳолат юзасидан жиноят ишлари қўзғатилган бўлиб, тергов ҳаракатлари олиб борилмоқда.
