Бу ҳақда Республика ихтисослаштирилган руҳий саломатлик илмий-амалий тиббиёт маркази ахборот хизмати маълум қилди.
Қайд этилишича, Марказнинг Навоий вилояти филиалида ташкил этилган мазкур иш ўринлари беморларнинг меҳнат кўникмаларини шакллантириш, ижтимоий фаоллигини ошириш ва жамиятга қайта мослашишига кўмаклашишга қаратилган.
Мутахассислар таъкидлашича, меҳнат терапияси даволаш ва реабилитация жараёнининг муҳим йўналишларидан бири ҳисобланади. Беморларни меҳнат фаолиятига жалб этиш орқали уларда масъулият ҳисси, ўз кучига ишонч ва мустақил ҳаётга интилишни ривожлантириш кўзда тутилган.
Шунингдек, бу жараён кундалик ҳаётга мослашиш, ижтимоий фаолликни тиклаш ҳамда келгусида жамиятга қайтиб, меҳнат фаолиятини давом эттириш учун зарур кўникмаларни шакллантиришга хизмат қилади.
Мазкур ишлар Ўзбекистон Республикаси Президентининг 2025 йил 3 ноябрдаги ПФ–207-сон Фармонида белгиланган вазифалар доирасида амалга оширилмоқда.
