Қайд этилишича, 2025 йилда дунё бўйича тахминан 10,6 миллион киши туберкулёзга чалинган, 1,13 миллион нафар бемор эса ушбу хасталик оқибатида вафот этган.
Шунга қарамай, глобал миқёсда ижобий ўзгаришлар бор. Хусусан, 2015–2025 йилларда дунёда силдан ўлим ҳолатлари 35 фоизга, касалланиш даражаси эса 14 фоизга камайган. 2000 йилдан буён олиб борилган даволаш чоралари натижасида тахминан 86 миллион инсоннинг ҳаёти сақлаб қолинган.
Марказий Осиё давлатларида ҳам силга қарши курашиш бўйича сезиларли натижалар қайд этилган. Жумладан, Ўзбекистонда 2025 йилга келиб, 2015 йилга нисбатан туберкулёздан ўлим ҳолатлари камида 75 фоизга қисқарган. Бу ЖССТнинг силга барҳам бериш стратегиясида белгиланган муҳим мақсадли кўрсаткичлардан биридир.
Бироқ дори воситаларига чидамли сил касаллиги — минтақа учун ҳамон долзарб муаммолардан бири. Шарқий Европа ва Марказий Осиёда бундай ҳолатлар улуши нисбатан юқори.
Шундан келиб чиқиб, ЖССТ тегишли ҳукуматларни туберкулёзни эрта аниқлаш, самарали даволаш усулларини кенгайтириш ҳамда профилактика чораларини кучайтириш орқали ушбу хасталикка барҳам бериш ишларини жадаллаштиришга чақирди.
ССВ Матбуот хизмати.
