9 ноябрь куни Давлат хавфсизлик хизмати, Бош прокуратура, Ички ишлар вазирлиги, Фавқулодда вазиятлар вазирлиги, «Ўзэнергоинспекция» ҳамда «Ҳудудгазтаъминот» АЖ ходимлари ҳамкорлигида ўтказилган назорат тадбирларида 7 та ҳолатда жами 249 та газ баллони ноқонуний сақланаётгани аниқланди.

Аниқланган ҳолатларнинг айримлари газ таъминоти тизими ходимлари билан боғлиқ. Жумладан, Қорақалпоғистон Республикасида «Амударётумангаз» бўлими суюлтирилган газ хизмати чилангари 104 та газ баллонини тегишли ҳужжатларсиз ва ёнғин хавфсизлиги талабларига зид равишда сақлаб келган.

Сурхондарё вилоятида «Шерободтумангаз» таъминоти бўлими ҳайдовчиси ўз хонадонида 25 та газ баллонини сақлаган. Тошкент вилоятида эса «Қуйичирчиқтумангаз» бўлими газ тўлдириш шохобчаси ходимида 3 та газ баллони борлиги аниқланган.

Қонунбузилишлар фақат тизим ходимлари билан чекланмаган. Наманган шаҳрида 1986 йилда туғилган шахс кейинчалик аҳолига сотиш мақсадида ўз хонадонида 20 та газ баллонини сақлаган.

Қашқадарё вилоятининг Касби туманида эса 1974 ва 1996 йилларда туғилган икки нафар фуқаронинг хонадонларида жами 92 та газ баллони ёнғин хавфсизлиги талабларига зид равишда сақланган.

Хоразм вилоятининг Хонқа туманида 1995 йилда туғилган шахс маҳалладаги умумий овқатланиш шохобчасида аҳоли учун ажратилган, газ идораларига тегишли 5 та баллондан ноқонуний фойдаланган.

Бу бир кунлик назорат тадбирларида аниқланган ҳолатлар билан чекланмайди. Маълум қилинишича, 20 октябрдан буён республика бўйича 370 та ҳолатда жами 9 455 та газ баллони ноқонуний сақланаётгани аниқланган. Улардаги суюлтирилган газ миқдори 102 158 килограммни ташкил этган.

Бундай ҳолатлар нафақат аҳолини газ билан таъминлашга, балки хавфсизликка ҳам таҳдид туғдиради. Газ баллонларини белгиланган талабларга зид равишда кўп миқдорда сақлаш ёнғин ва портлаш хавфини оширади.

Фуқаролардан газ баллонларининг шубҳали савдоси, ноқонуний тўпланиши ва хавфли шароитда сақланиши ҳолатлари ҳақида Давлат хавфсизлик хизматининг 1520 қисқа рақамига хабар бериш сўралган. Мурожаат қилувчининг шахси сир сақланиши кафолатланади.