Бу ҳақда «Ўзбекистон 24» телеканали хабар берди.
Қайд этилишича, Бош прокуратура ҳузуридаги Иқтисодий жиноятларга қарши курашиш департаментининг Қашқадарё вилояти бошқармаси ҳамда ҳуқуқни муҳофаза қилувчи органлар ходимлари ҳамкорлигида Қарши шаҳридаги «Қорлиқбоғот» маҳалласида тезкор тадбир ўтказилган.
Тадбир давомида Касби тумани тез тиббий ёрдам станцияси бригада фельдшери бўлиб ишловчи шахс фуқарога уч турдаги 200 дона дори воситасини 15 миллион сўмга сотаётган вақтида ашёвий далиллар билан ушланган.
Экспертиза хулосасига кўра, олинган 300 мг дозадаги 60 дона таблетка таркибида 18 грамм инсон руҳиятига кучли таъсир қилувчи модда мавжудлиги аниқланган.
Шунингдек, Департаментнинг Чилонзор туман бўлими ҳамда Ички ишлар вазирлиги ходимлари томонидан ўтказилган бошқа тезкор тадбирда фуқаро харидорга беш дона ва уч қути инсон руҳиятига кучли таъсир қилувчи дори воситасини 295 АҚШ долларига сотаётганда ушланган.
Ундан таркибида кучли таъсир қилувчи модда бўлган, умумий қиймати 388 миллион 352 минг сўмлик 1156 дона дори воситаси ашёвий далил сифатида олиб қўйилган.
Мазкур ҳолатлар юзасидан жиноят ишлари қўзғатилиб, ҳозирда тергов ҳаракатлари олиб борилмоқда.
