Мамлакатимизда Президент соврини учун илк бор ўтказилган “Янги Ўзбекистон бунёдкорлари” касбий маҳорат миллий танловида эришган ютуқларингиз билан барчангизни чин қалбимдан самимий муборакбод этаман.
Ватанимизнинг бугунги шиддатли тараққиёти, ҳаётимизга кириб келаётган рақамли иқтисодиёт, замонавий корхоналар ўз ишининг устаси бўлган, рақобатбардош касб эгаларини тайёрлаш ва рағбатлантиришни талаб этмоқда.
Биз ана шу ўткир заруратни ҳисобга олиб ҳамда азалдан илм ва ҳунар эгаларини эъзозлаб келадиган халқимизнинг эзгу анъаналарини ривожлантириш мақсадида мазкур миллий танловни ташкил этдик. Касб-ҳунар сирларини чуқур эгаллаган, пухта билим ва юқори кўникмага эга, ўз соҳасида янгилик ярата оладиган сизлар каби навқирон ёшларимизнинг бугунги эришган натижалари бу қароримиз нақадар тўғри бўлганини яна бир бор тасдиқламоқда.
Дарҳақиқат, уч босқичда ўтган ушбу нуфузли танловда минглаб ёшлар катта қизиқиш ва иштиёқ билан фаол иштирок этди. Айниқса, танловнинг дастлабки – туман ва шаҳар босқичида 124 минг нафардан зиёд ўғил-қизларимиз ўз истеъдод ва қобилиятларини намоён этганлари барчамизни қувонтиради. Кейинги – ҳудудий босқичда қатнашган қарийб 7 минг нафар иштирокчининг 3 минг 500 нафари ўзини ўзи банд қилган маҳалла ёшлари экани эътиборлидир.
Яна бир муҳим жиҳати – мазкур танлов кўплаб мактаб битирувчиларининг шахсий ҳаётида янги саҳифа очгани, яъни 22 минг нафар йигит-қиз учун ишлаш, таълим олиш ёки меҳнат бозорида ўз ўрнини топиш имконияти пайдо бўлганини таъкидлаш лозим. Хусусан, маҳаллий корхона ва ташкилотлар томонидан бўш иш ўринлари тақдимоти ўтказилиб, зарур касбий билим ва маҳоратга эга бўлса-да, ҳозирча иш тополмай юрган қарийб 8 минг 900 нафар қатнашчига ишлаш учун йўлланмалар берилди. Таълим олиш истагини билдирган 4 минг 470 нафар иштирокчи техникумларда ўқиш учун тавсия этилди. Чет элда ишлашни режалаштираётган салкам 8 минг 340 нафар ёшлар хорижий иш берувчилар томонидан ўтказиладиган танловларга йўналтирилди.
Танлов якунига кўра, ўнта касб йўналишида энг юқори натижага эришган 120 нафар иштирокчи ғолиб ва совриндор деб топилди. Бугунги маросимда танловнинг махсус мукофотлари билан тақдирланаётган ана шу ёшларимизни чин дилдан табриклайман.
Фурсатдан фойдаланиб, уларга мустаҳкам таянч бўлиб турган меҳрибон ва талабчан устозлар, ота-оналар, ишлаб чиқариш таълими усталари, амалий машғулот раҳбарлари ва экспертларга самимий миннатдорлик билдираман.
Шунингдек, танловни юқори савияда ташкил этишга ҳисса қўшган вазирлик ва идоралар, ҳокимликлар, маҳаллалар, иш берувчи корхоналар, ҳомий ва ҳамкор ташкилотларга ҳам алоҳида ташаккур айтаман.
Азиз ўғил-қизларим!
Бугун олдимизда янада масъулиятли вазифа турибди. Танлов ғолиблари ва юқори натижа кўрсатган иштирокчилар орасидан Ўзбекистон терма жамоасини шакллантириб, уларнинг касб-ҳунар бўйича “WorldSkills International” халқаро танловида муносиб иштирок этиши учун тайёргарликни ҳозирдан бошлашимиз керак. Шу мақсадда энг кучли маҳаллий ва хорижий мутахассисларни жалб этамиз, жамоани замонавий ускуналар, ўқув-машқ базаси билан таъминлаб, барча зарур шароитларни яратиб берамиз.
Сизлар дунёдаги энг кучли тенгдошларингиз билан муносиб равишда беллашиб, мана шундай нуфузли касбий маҳорат мусобақасида юртимиз байроғини баланд кўтаришингизга тилакдошман.
Бу йўлда сизларга юртимиз тарихидаги гўзал ва бетакрор цивилизация намуналарини яратган, ажойиб амалий санъат асарлари билан дунёни ҳайратга солиб келаётган қўлигул уста ва меъморларимиз, моҳир ҳунармандларимизнинг бой мероси, ҳозирги кунда уларнинг анъаналарини давом эттириб, замон талаблари асосида янги босқичга кўтараётган касб эгаларининг маҳорат мактаблари албатта куч ва илҳом беради.
Мен бутун Ўзбекистон ёшларига мурожаат қилиб айтмоқчиман: халқимизнинг сизларга бўлган юксак ишончини оқлаш учун доимо изланинг, янги билим ҳамда технологияларни эгалланг, хорижий тилларни ўрганинг ва касбингиз бўйича энг илғор мутахассис бўлиб етишинг!
Зеро, ёшликда олинган таълим ва малака бамисоли тошга ўйилган нақш, келажакдаги улкан ютуқлар пойдеворидир.
Сизлар ўз меҳнатингиз, билим ва кўникмаларингиз билан нафақат оилангиз ва жамоангиз, балки жонажон мамлакатимиз тараққиётига муносиб ҳисса қўшасиз, Янги Ўзбекистонни бунёд этадиган олтин авлод бўлиб, унинг шуҳратини дунёга тараннум этасиз деб ишонаман.
Юксак ғалаба барчангизга муборак бўлсин, азиз фарзандларим!
Шавкат Мирзиёев,
Ўзбекистон Республикаси Президенти
