Олтин медаллар
Пара пауэрлифтинг бўйича Ақидахон Ахтамова аёллар ўртасида 55 килограмм вазн тоифасида 128 килограмм оғирликни кўтариб, олтин медални қўлга киритди. У Пара Осиё ўйинлари рекордини ҳам ўрнатди. Хитой вакили 117 килограмм натижа билан иккинчи, Таиланд спортчиси эса 112 килограмм билан учинчи ўринни эгаллади.
Пара велотрек бўйича эркаклар ўртасида C5 классида 4000 метрга якка таъқиб пойгасида Боймурод Ёвкочев ғолиб бўлиб, олтин медалга сазовор бўлди. Азимбек Абдуллаев эса мазкур дастурда кумуш медални қўлга киритди. Бронза медаль Бирлашган Араб Амирликлари вакилига насиб этди.
Пара дзюдо бўйича Шоҳрух Мамедов эркаклар ўртасида J1 классида 81 килограмм вазн тоифасида чемпион бўлди. У ҳал қилувчи беллашувда тожикистонлик рақибини мағлуб этиб, Ўзбекистон делегацияси ҳисобини олтин медаль билан бойитди.
J1 классида 95 килограммгача бўлган вазн тоифаси финалида Муҳаммад Абдуқулов Тўрғун Абдиевни мағлуб этиб, олтин медални қўлга киритди. Тўрғун Абдиев эса кумуш медаль билан тақдирланди. Ушбу вазн тоифасида бронза медаллари Эрон ва Индонезия вакилларига насиб этди.
Аёллар ўртасида J2 классида 60 килограммгача бўлган вазн тоифасида Кумушхон Ходжаева финалда хитойлик рақибасини мағлуб этиб, олтин медаль соҳиби бўлди.
Пара сузиш бўйича эркаклар ўртасида S13 классида 400 метрга эркин усулда сузиш баҳсларида Дмитрий Хорлин 4 дақиқа 21,32 сония натижа билан биринчи ўринни эгаллади. Егор Болотов эса 4 дақиқа 21,94 сония натижа билан кумуш медални қўлга киритди. Учинчи ўрин Қатар вакилига насиб этди.
Кумуш медаллар
Пара енгил атлетика бўйича Асила Мирзаёрова аёллар ўртасида Т11 классида 200 метрга югуриш финалида 25,86 сония натижа кўрсатиб, кумуш медални қўлга киритди. У мусобақада йўлбошловчи югурувчи Сардор Бахтиёров ҳамроҳлигида иштирок этди.
Ёқутхон Холбекова F12 классида найза улоқтириш баҳсларида 32,43 метр натижа қайд этиб, кумуш медаль билан тақдирланди. Қайд этиш жоизки, найза улоқтириш спортчининг асосий ихтисослашган йўналиши ҳисобланмайди.
Ёрқинбек Одилов F57 классида диск улоқтириш баҳсларида 45,10 метр натижа кўрсатиб, кумуш медални қўлга киритди. Ушбу йўналиш ҳам спортчининг асосий ихтисослиги ҳисобланмайди.
Пара пауэрлифтинг бўйича Насиба Тошпўлатова аёллар ўртасида 50 килограмм вазн тоифасида 123 килограмм оғирликни кўтариб, кумуш медаль соҳиби бўлди.
Бронза медаллар
Пара енгил атлетика бўйича Анжелина Колесникова F44/F64 классида диск улоқтириш баҳсларида 30,10 метр натижа билан бронза медалини қўлга киритди.
Диёрбек Умаров F12 классида ядро улоқтириш финалида 12,54 метр натижа кўрсатиб, учинчи ўринни эгаллади.
Содиқжон Мамадиев T37 классида узунликка сакраш баҳсларида 5,69 метр натижа билан бронза медалига сазовор бўлди.
Пара дзюдо бўйича Отабек Ирисбеков эркаклар ўртасида J2 классида 81 килограммгача бўлган вазн тоифасида бронза медалини қўлга киритди. У учинчи ўрин учун кечган беллашувда мўғулистонлик рақибини мағлуб этди.
Ўзбекистонлик параспортчилар бугун пара енгил атлетика, пара велотрек, пара дзюдо, пара сузиш, пара таэквондо, пара ўқ отиш, пара пауэрлифтинг ва бочча бўйича баҳсларда иштирок этмоқда. Мусобақалар давом этмоқда.
