12 октябрь куни Грузиянинг Цинандали шаҳрида Ўзбекистон ва Грузия ўртасидаги иқтисодий ҳамкорлик бўйича Ҳукуматлараро комиссиянинг 11-йиғилиши бўлиб ўтди. Унда Ўзбекистон инвестициялар, саноат ва савдо вазири Лазиз Қудратов ҳамда Грузия бош вазири ўринбосари, иқтисодиёт ва барқарор ривожланиш вазири Мариам Квривишвили ҳамраислик қилди.
Шу куни Грузия бош вазири Ираклий Кобахидзе Лазиз Қудратовни ҳам қабул қилди. Учрашувда Ўзбекистон Президенти Шавкат Мирзиёевнинг самимий саломи ва эзгу тилаклари етказилди.
Музокараларда жорий йил июль ойида Ўзбекистон Президентининг Грузияга давлат ташрифидан сўнг икки мамлакат ўртасидаги муносабатлар сифат жиҳатидан янги босқичга кўтарилгани таъкидланди. Стратегик шериклик даражасига ўтиш иқтисодий ҳамкорликни янада ривожлантириш учун қўшимча имкониятлар яратгани қайд этилди.
Савдо ҳажмини ошириш режалаштирилмоқда
Йиғилишда ўзаро савдо ҳажмини кўпайтириш асосий масалалардан бири бўлди. 2025 йилда икки мамлакат ўртасидаги товар айирбошлаш ҳажми қарийб 270 миллион долларни ташкил этган.
Томонлар эркин савдо режими имкониятларидан тўлиқ фойдаланиш, етказиб берилаётган маҳсулотлар турини кенгайтириш ҳамда ишлаб чиқарувчилар ва савдо тармоқлари ўртасида тўғридан-тўғри алоқаларни ривожлантириш зарурлигини таъкидлади.
Товар айирбошлаш ҳажмини 1 миллиард долларга етказиш мақсадида аниқ товар позициялари, мақсадли кўрсаткичлар ва амалга ошириш муддатларини қамраб олган қўшма чора-тадбирлар дастурини ишлаб чиқишга келишилди. Ишчи гуруҳ дастурнинг тайёрланиши ва натижаларини мунтазам баҳолаб боради.
Шунингдек, ўзаро саноат кўргазмалари ва бизнес-миссияларни ташкил этиш орқали икки мамлакат маҳсулотларини янги бозорларга олиб чиқиш масалалари кўриб чиқилди.
Саноат кооперацияси кенгайтирилади
Учрашувда саноат, қурилиш, қишлоқ хўжалиги, энергетика ва молия соҳаларидаги қўшма ташаббусларни амалга ошириш жараёни ҳам муҳокама қилинди.
Бугунги кунда Ўзбекистонда Грузия капитали иштирокидаги 116 та корхона, Грузияда эса Ўзбекистон капитали иштирокидаги 144 та компания фаолият юритмоқда.
Томонлар Ўзбекистоннинг саноат салоҳиятини Грузиянинг технологиялар, дизайн, сертификатлаш ва маҳсулотларни бозорга олиб чиқиш борасидаги тажрибаси билан уйғунлаштириш имкониятларини кўриб чиқди. Бу борада фармацевтика, енгил ва озиқ-овқат саноатида, жумладан, Европа бозорларига йўналтирилган қўшма ишлаб чиқаришларни ташкил этиш истиқболларига эътибор қаратилди.
Поти портида Ўзбекистон логистика маркази ташкил этилади
Транспорт ва логистика соҳасидаги ҳамкорлик ҳам музокараларнинг муҳим йўналишларидан бири бўлди. Грузиянинг Қора денгиз портлари орқали Ўзбекистон маҳсулотларини Европа бозорларига етказиб беришдаги ўрни таъкидланди.
Томонлар Транскаспий халқаро транспорт йўналиши бўйича алоқаларни мустаҳкамлаш, порт ва омбор инфратузилмасини модернизация қилиш, транзит шароитларини яхшилаш ҳамда юк ташиш рақобатбардошлигини ошириш масалаларини муҳокама қилди.
Асосий ташаббуслардан бири Грузиянинг Поти портида Ўзбекистон логистика марказини ташкил этиш ҳисобланади. Бу йўналишда тегишли битим имзоланган ва Ўзбекистон маҳсулотларининг Европа томон илк синов юк жўнатмаси амалга оширилган.
Мазкур йўналишни ривожлантириш орқали Грузия ҳудуди бўйича юк ташиш ҳажмини 2030 йилга бориб йилига 3 миллион тоннага етказиш имконияти кўриб чиқилмоқда.
Туризм ва ҳудудлараро ҳамкорлик ҳам ривожлантирилади
Музокараларда қўшма туристик йўналишларни ташкил этиш, тўғридан-тўғри авиақатновларни кенгайтириш, меҳмонхона ва соғломлаштириш инфратузилмасига оид ташаббусларни амалга ошириш истиқболлари ҳам кўриб чиқилди.
Ҳудудлараро алоқаларни мустаҳкамлаш мақсадида делегацияларнинг ўзаро ташрифлари жадвалини тайёрлаш ва 2027 йилда биринчи Ўзбекистон — Грузия ҳудудлар форумини ўтказиш масаласини ишлаб чиқишга келишилди. Форум маҳаллий ишлаб чиқарувчилар, инвесторлар ва ишбилармон доиралар ўртасида янги алоқаларни йўлга қўйишга хизмат қилиши кутилмоқда.
Йиғилиш якунида келишувларни амалга ошириш бўйича кейинги қадамлар белгилаб олинди. Ҳукуматлараро комиссиянинг 12-йиғилишини 2027 йил февраль ойида Тошкент вилоятида икки мамлакат ишбилармон доиралари вакиллари иштирокида ўтказишга келишилди.
