Бу ҳақда Тошкент шаҳар ҳокимлиги ахборот хизмати маълум қилди,
Қайд этилишича, фойдаланишга расман топширилмаган талабалар турар жойига жойлаштирилган талабалар бошқа ётоқхоналар ва ижара хонадонларига кўчирилди.
Ҳолат юзасидан Тошкент шаҳар ҳокими ўринбосари Дурдона Раҳимова бошчилигидаги ишчи гуруҳ талабалар ётоқхонасига бориб, вазиятни жойида ўрганди. Ўрганишда тадбиркор, тегишли масъуллар, прокуратура ходимлари ҳамда Тошкент давлат техника университети раҳбарияти иштирок этди.
Маълум бўлишича, Талабалар шаҳарчасида давлат-хусусий шериклик асосида қурилган мазкур талабалар турар жойи ҳали расман фойдаланишга топширилмаган. Объектнинг кадастр ҳужжатлари расмийлаштирилмаган, ундан фойдаланиш учун зарур рухсатлар ҳам олинмаган.
Бундан ташқари, бинода иссиқ сув ва иситиш тизимлари ҳали уланмаган, ёнғин хавфсизлиги бўйича ҳам объект амалдаги талабларга жавоб бермайди.
Шу сабабли талабалар хавфсизлигини таъминлаш мақсадида улар мазкур объектдан чиқарилиб, университетнинг мавжуд талабалар турар жойлари ҳамда ижара хонадонларига тўлиқ жойлаштирилди.
Талабалардан ушбу объектга аввал жойлаштирилгани учун ундирилган тўловлар эса тадбиркор томонидан 3 кун муддатда тўлиқ қайтариб берилади.
Айни пайтда объектнинг кадастр ҳужжатларини расмийлаштириш ва ундан фойдаланиш учун зарур рухсатларни олиш бўйича ишлар давом эттирилмоқда.
Ҳолатнинг барча жиҳатлари ўрганилиб, талабаларнинг хавфсизлиги ва қонуний манфаатларини таъминлаш бўйича тегишли чоралар кўрилмоқда.
