Бу ҳақда ИИВ Маънавий-маърифий ишлар ва кадрлар билан таъминлаш департаменти ахборот хизмати маълум қилди.
Танлов ғолиблари Ички ишлар вазирлиги томонидан пул мукофотлари ва қимматбаҳо эсдалик совғалари билан тақдирланди.
Тақдирлаш маросими Ўзбекистондаги Ислом цивилизацияси марказида бўлиб ўтди. Шу куни Ички ишлар вазирлиги ва марказ ўртасида ҳамкорлик меморандуми ҳам имзоланди.
Танлов натижаларига кўра, иккинчи ўрин Навоий вилояти ИИБ капитани Бунёд Тўймуродовга, учинчи ўрин эса Беруний тумани ИИБ лейтенанти Элмира Ўрозматовага насиб этди.
Тадбирда ички ишлар вазири ўринбосари, полковник Диёрбек Саттаров, Ислом цивилизацияси маркази директори Фирдавс Абдухолиқов, вазирлик ва марказ вакиллари ҳамда танлов иштирокчилари қатнашди.
Имзоланган меморандум ички ишлар органлари ходимлари, курсантлар ва тингловчиларнинг тарихий, маънавий-маърифий билимларини ошириш, буюк алломалар меросини чуқур ўрганиш ҳамда китобхонлик маданиятини ривожлантиришга қаратилган.
Ҳамкорлик доирасида марказда очиқ дарслар, маърифий учрашувлар, давра суҳбатлари, конференция ва семинарлар ўтказиш, шунингдек, ходимлар учун экскурсиялар ташкил этиш режалаштирилган.
Ташкилотчиларнинг таъкидлашича, ушбу ташаббуслар ходимларнинг нафақат касбий маҳоратини, балки маънавий салоҳиятини ҳам юксалтириш, уларда миллий ғурур ва Ватанга садоқат туйғуларини мустаҳкамлашга хизмат қилади.
