Ҳужжат билан улушли қурилиш соҳаси алоҳида қонун билан тартибга солиниб, фуқаролар маблағини ҳимоя қилишнинг ҳуқуқий ва молиявий кафолатлари жорий этилмоқда.
Қайд этилишича, кейинги йилларда мамлакатда қурилиш ҳажми кенгайиб, кўп квартирали уйлар барпо этилмоқда. Бироқ айрим объектлар белгиланган муддатларда фойдаланишга топширилмаётгани ҳамда улушли қурилиш муносабатлари ягона қонун билан тартибга солинмагани сабабли айрим фуқаролар уй-жой харид қилиш жараёнида муаммоларга дуч келмоқда.
Қонун лойиҳаси ана шу муаммоларни бартараф этиш, улушли қурилиш иштирокчилари ҳуқуқ ва мажбуриятларини аниқ белгилаш ҳамда фуқаролар манфаатларини ишончли ҳимоя қилишга қаратилган.
Ҳужжатга кўра, энди фуқароларнинг улушли қурилишга киритадиган маблағлари тўғридан-тўғри қурувчи ихтиёрига берилмайди. Ушбу маблағлар банкларда очиладиган эскроу ҳисобварағида сақланади ва қурилиш белгиланган талаблар асосида якунланиб, объект фойдаланишга топширилганидан кейингина қурувчига ўтказилади.
Шунингдек, қурувчи (девелопер) фақат қонунда белгиланган талабларга жавоб берган, Ягона ахборот тизимида рўйхатдан ўтган, ваколатли банк билан бош битим тузган ҳамда лойиҳа декларациясини эълон қилган тақдирдагина аҳоли маблағларини жалб қилиш ҳуқуқига эга бўлади.
Лойиҳада улушли иштирок этиш шартномасини нотариал тасдиқлаш ва уни давлат рўйхатидан ўтказиш мажбурий этиб белгиланмоқда. Бу бир объектнинг такроран сотилиши, сохта ёки ноқонуний шартномалар тузилиши каби ҳолатларнинг олдини олишга хизмат қилади.
Қонун лойиҳасига мувофиқ, агар қурувчи қонун талабларини бузган ҳолда фуқаролар маблағларини жалб қилса, улушдор ўз маблағини қайтаришни ҳамда ушбу маблағдан фойдаланилган давр учун фоиз тўланишини талаб қилиш ҳуқуқига эга бўлади. Агар бу талаб ўз вақтида бажарилмаса, фуқаро судга мурожаат қилиши мумкин.
Шу билан бирга, қурилиш жараёни тўхтаб қолишининг олдини олиш учун зарур ҳолларда ваколатли банк ёки қурувчини алмаштириш, қурилишнинг узлуксиз молиялаштирилишини таъминлашга қаратилган молиявий механизмлар ҳам жорий этилмоқда.
Яна бир муҳим янгилик — улушли қурилишга оид барча маълумотлар Ягона ахборот тизимида жойлаштирилади. Бу орқали фуқаролар қурувчи компания, қурилиш объекти ва лойиҳанинг амалга оширилиши ҳақидаги муҳим маълумотлар билан очиқ танишиш имкониятига эга бўлади.
Бундан ташқари, қонунчилик талабларини бузган ҳолда улушли қурилишни амалга оширганлик учун жавобгарлик чоралари ҳам назарда тутилмоқда.
Қонун ташаббускорларига кўра, мазкур нормалар фуқароларнинг уй-жой қурилишига киритган маблағларини ҳуқуқий ва молиявий жиҳатдан ишончли ҳимоя қилиш, қурилиш соҳасида шаффофликни таъминлаш ҳамда алданиб қолиш ҳолатларининг олдини олишга хизмат қилади.
