Ҳуқуқни муҳофаза қилувчи органлар маълумотига кўра, операциялар натижасида 2 нафар гуруҳ етакчиси ва 35 нафар аъзо қўлга олинган.

Шунингдек, бир ой давомида 4 та яширин нарколаборатория ва 1 та интернет орқали фаолият юритган наркодўкон раҳбари фош этилди. Тожикистон билан ҳамкорликда халқаро даражадаги тезкор тадбир ҳам ўтказилган.

Тергов маълумотларига кўра, қўлга олинган жиноий гуруҳлар республикадаги 50 та туман ва шаҳар аҳолиси орасида наркотик моддалар тарқатиб келган.

Тезкор тадбирлар давомида ушбу гуруҳлардан 285 килограмм анъанавий наркотик моддалар, бу тахминан 855 минг дозага тенг экани, шунингдек, 410 минг дона психотроп дори воситалари ва наркотик тайёрлаш учун мўлжалланган 42 литр ноқонуний прекурсорлар мусодара қилинган.

Қайд этилишича, ушбу жиноий тармоқлар орқали бир йилда ўртача 2,6 миллион дона психотроп дори воситалари, 1,4 тонна «гашиш» ва «опий» ҳамда 500 килограмм синтетик наркотик моддалар тарқатилишининг олди олинган.

Ҳуқуқни муҳофаза қилувчи органлар наркожиноятларга қарши кураш ишлари қатъий давом эттирилишини билдирди.