Ўрганиш давомида Тошкент вилояти, Оҳангарон тумани, “Янги ҳаёт” қўрғони, Оҳангарон трассасининг 32-километрида жойлашган маиший чиқиндиларни жойлаштириш полигонида чиқиндиларни жойлаштириш ва кўмиш талаблари етарли даражада ташкил этилмаганлиги натижасида 2026 йил 10 июль куни ёнғин содир бўлганлиги аниқланди. Ҳолат юзасидан шу куннинг ўзида Тошкент вилояти Экология ва иқлим ўзгариши бош бошқармаси ходимлари томонидан жойига чиқиб ўрганиш ўтказилган ва аниқланган ҳолат юзасидан полигон раҳбари маъмурий жавобгарликка тортилган ҳамда ёнғинни тезда бартараф этиш бўйича мажбурий кўрсатма берилган.
Экополиция томонидан ўтказилган қайта ўрганишда мажбурий кўрсатма берилишига қарамасдан, полигон раҳбари томонидан ҳолат бартараф этилмаганлиги ва 11-июль куни ҳам ёнғин давом этганлиги кузатилган. Экополиция ходимлари томонидан полигон раҳбари Р.Б. Ўзбекистон Республикаси МЖтКнинг 91-моддаси 2-қисми билан такрорий жаримага тортилиб, лаборатория ходимлари жалб этилган ҳолда атмосфера ҳавосининг ифлосланиши бўйича лаборатория таҳлиллари ўтказилган. Таҳлил натижаларига кўра, ёнғин оқибатида атмосферага ташланган ифлослантирувчи моддалардан углерод оксиди – 10,7 марта, формальдегид моддаси – 12,2 марта, азот икки оксиди – 12,8 марта, олтингугурт икки оксиди – 9 марта, водород сульфид – 1,5 марта белгиланган концентрациядан ошиб кетганлиги аниқланган.
Метеорологик кузатувларга кўра, 11 июль куни кечки соат 19:00 дан 20:00 гача Тошкент шаҳрида шамолсизлик (штиль) кузатилган. Сўнгра шамол қисқа вақт ичида кучайиб, айнан шарқий ва жануби-шарқий йўналишдан (Оҳангарон йўналиши) 5–8 м/с, айрим ҳудудларда эса 10 м/с дан юқори тезликда эсган. Шу даврда атмосфера ҳавоси мониторинг станцияларида ПМ₂,₅ ва ПМ₁₀ концентрацияларининг бир вақтда ошиши қайд этилган.
Ўтказилган лаборатория таҳлиллари натижалари бўйича атмосфера ҳавосининг ифлосланиши юзасидан “МАХСУСТРАНС-ИШБ” ДУКга 683 млн 870 минг сўм миқдорида қўшимча компенсация тўловлари ҳисобланиб, ҳужжатлар суд органига юбориш учун тайёрланмоқда.
Маълумот учун, Оҳангарон тумани, “Янги ҳаёт” ҳудудида жойлашган маиший чиқиндиларни жойлаштириш полигонини қуриш ишлари 2021 йилда бошланган. Бугунги кунда полигон қурилиши якунига етказилмаган ҳамда фойдаланишга топширилмаган. Аммо “МАХСУСТРАНС-ИШБ” ДУК томонидан 2025 йил май ойидан буён Тошкент шаҳридан ҳосил бўлган маиший чиқиндилар ушбу полигонга олиб келиниб жойлаштирилмоқда.
