Лойиҳа 2025 йил октабр ойида Президент Администрацияси Раҳбари Саида Мирзиёева томонидан бошланган бўлиб, «Эл-юрт умиди» жамғармаси томонидан Оксфорд университети ҳамда Алишер Навоий номидаги Тошкент давлат ўзбек тили ва адабиёти университети ҳамкорлигида амалга оширилмоқда.
Ёзги мактабда Оксфорд университети талабалари ва тадқиқотчилари ўзбек ва чиғатой тилларини чуқур ўрганиш, шунингдек, Ўзбекистон тарихи, адабиёти, тасаввуф, жадидчилик, қўлёзма мерос ва миллий маданият бўйича билимларини мустаҳкамлаш имконига эга бўлади.
Таълим дастури Тошкент, Самарқанд ва Бухоро шаҳарларини қамраб олиб, музейлар, тарихий обидалар, кутубхоналар ва ҳунармандчилик марказларига ташрифларни ҳам ўз ичига олади.
Ёзги мактаб «Оксфорд ўзбекшунослик дастури»нинг муҳим амалий босқичи бўлиб, ўзбек тили, тарихи ва маданиятини халқаро академик майдонда кенг тарғиб этишга хизмат қилади.
