Тошкент шаҳар Қурилиш ва уй-жой коммунал хўжалиги соҳасида ҳудудий назорат инспекцияси маълум қилишича, ҳолат «Ислом ота» маҳалласидаги «Қорақамиш 1/2» мавзесида жойлашган уйда мурожаат асосида ўрганилган.

Аниқланишича, лойиҳа бўйича очиқ айвон бўлиши керак бўлган том қисмида айрим фуқаролар томонидан оғир ва енгил турдаги ноқонуний қурилмалар барпо этилган.

Масъуллар бу каби қурилишлар кўп квартирали уйда яшовчилар хавфсизлигига жиддий таҳдид солишини таъкидламоқда. Қайд этилишича, бундай қурилмалар бинога қўшимча юклама бериб, унинг сейсмик барқарорлиги ва техник ҳолатига салбий таъсир кўрсатиши мумкин.

Мазкур ҳолат юзасидан мулкдорларга қурилмаларни бартараф этиш бўйича муддатли ёзма кўрсатмалар берилган. Агар қонунбузарликлар белгиланган муддатда бартараф этилмаса, айбдорларга нисбатан маъмурий чоралар қўлланилиши ҳамда қурилмалар мажбурий тартибда буздирилиши мумкинлиги билдирилди.

Эслатилишича, бундай қонунбузарликлар учун жисмоний шахсларга базавий ҳисоблаш миқдорининг 50 баравари, юридик шахсларга эса 100 баравари миқдорида жарима белгиланган.