Шу муносабат билан жорий йилнинг 22 июль куни Хитой Ижтимоий фанлар академиясининг Россия, Шарқий Европа ва Марказий Осиё институтида “Хитой–Ўзбекистон: стратегик уйғунлик ва юксак тараққиёт” мавзусида Ўзбекистон–Хитой ақл марказлари форуми бўлиб ўтди.
Форумда Хитойнинг етакчи ақл марказлари раҳбарлари, академик доиралар вакиллари, экспертлар ҳамда “Тараққиёт стратегияси” маркази ижрочи директори Элдор Туляков бошчилигидаги Ўзбекистон делегацияси иштирок этди.
Форумнинг асосий мавзуси мамлакатлар ўртасидаги стратегик шерикликни мустаҳкамлаш, “Ўзбекистон – 2030” стратегиясида белгиланган устувор йўналишлар юзасидан тажриба алмашиш ҳамда янги ҳамкорлик истиқболларини муҳокама қилишга бағишланди.
Тадбирда “Тараққиёт стратегияси” маркази томонидан “Ўзбекистон – 2030” стратегиясининг мазмун-моҳиятига бағишланган махсус тўпламнинг хитой тилидаги нашри тақдим этилди. Мазкур нашр форум иштирокчилари, хитойлик экспертлар ҳамда илмий доиралар вакилларига тарқатилди. Унда стратегиянинг устувор йўналишлари, мамлакатимизда амалга оширилаётган кенг кўламли ислоҳотларнинг мазмун-моҳияти, эришилган натижалар ва истиқболдаги устувор вазифалар батафсил ёритилган.
“Тараққиёт стратегияси” маркази ижрочи директори Элдор Туляков мамлакатимизда “Ўзбекистон – 2030” стратегияси доирасида амалга оширилаётган кенг қамровли ислоҳотлар, уларнинг дастлабки натижалари ҳамда истиқболдаги вазифалар ҳақида батафсил маълумот берди. Хусусан, иқтисодиётни либераллаштириш, инвестиция муҳитини яхшилаш, давлат бошқарувини такомиллаштириш, аҳоли фаровонлигини ошириш, ташқи сиёсатни фаоллаштириш ва экологик барқарорликни таъминлаш борасида амалга оширилаётган ишларга алоҳида тўхталди.
Хитой Замонавий халқаро муносабатлар академияси илмий кенгаши бош котиби ўринбосари Дин Сяосин Ўзбекистонда камбағалликни қисқартириш, солиқ тизимини такомиллаштириш ҳамда “яшил” иқтисодиётни ривожлантириш соҳаларида амалга оширилаётган ислоҳотларни юқори баҳолади. У технопарклар ташкил этиш, автомобилсозлик, чиқиндиларни қайта ишлаш ва улардан энергия ишлаб чиқариш каби истиқболли йўналишларда қўшма лойиҳаларни кенгайтириш муҳим аҳамият касб этишини таъкидлади.
Шунингдек, у маданий-гуманитар алоқалар стратегик шерикликнинг муҳим таркибий қисми эканини қайд этиб, Ўзбекистонда Хитойнинг Ғарбий–Шарқий қишлоқ хўжалиги марказини ташкил этиш бўйича ишлар олиб борилаётганини маълум қилди.
Россия, Шарқий Европа ва Марказий Осиё институти Марказий Осиё бўлими бошлиғи Чжан Нин Президент Шавкат Мирзиёев раҳбарлигида амалга оширилаётган ислоҳотларни юқори баҳолаб, давлат бошқарувини оптималлаштириш, олий таълим қамровини кенгайтириш, чегарадош масалаларни ҳал этиш ҳамда мамлакатнинг халқаро нуфузини мустаҳкамлаш борасида эришилган натижаларни эътироф этди. У Хитой томони Ўзбекистонда амалга оширилаётган ислоҳотларни бундан буён ҳам ҳар томонлама қўллаб-қувватлашини билдирди.
Институтнинг катта илмий ходими Гао Ҳансун бугунги геосиёсий шароитда транспорт коридорларини диверсификация қилиш стратегик аҳамият касб этишини таъкидлаб, мазкур йўналишдаги ҳамкорлик “Ўзбекистон – 2030” стратегиясида белгиланган транспорт-коммуникация тизимини ривожлантириш мақсадларига ҳам хизмат қилишини қайд этди.
Форум якунида иштирокчилар Ўзбекистон ва Хитой ўртасидаги ҳар томонлама стратегик шериклик муносабатларини янада мустаҳкамлаш, ақл марказлари ўртасидаги ҳамкорликни кенгайтириш, илмий тадқиқотлар ва экспертлар алмашинувини фаоллаштириш, шунингдек, савдо-иқтисодий, инвестиция, инновация, транспорт, “яшил” тараққиёт ҳамда маданий-гуманитар соҳаларда қўшма ташаббусларни амалга ошириш бўйича ҳамкорликни изчил ривожлантириш муҳим аҳамият касб этишини таъкидладилар.
Мазкур форум ҳамда “Ўзбекистон – 2030” стратегиясига бағишланган махсус тўпламнинг хитой тилидаги нашри тақдимоти мамлакатимизда амалга оширилаётган ислоҳотларнинг мазмун-моҳиятини Хитойнинг илмий-эксперт доиралари ва кенг жамоатчилигига етказиш, шунингдек, Стратегияда белгиланган очиқ ва прагматик ташқи сиёсат, халқаро ҳамкорликни кенгайтириш, инновацион иқтисодиётни ривожлантириш ҳамда барқарор тараққиёт мақсадларини халқаро миқёсда тарғиб этишда муҳим аҳамият касб этди.
“Тараққиёт стратегияси” маркази Ахборот хизмати
