Ҳамюртимиз Т.М. Хитой фуқароси билан турмуш қурган бўлиб, айни пайтда икки нафар фарзандни тарбияламоқда. Дипломатларнинг сўзларига кўра, унинг саломатлиги билан боғлиқ вазият алоҳида назоратга олинган.
Ёрдам кўрсатиш доирасида бемор даволанаётган тиббиёт муассасаси билан алоқа ўрнатилди. Музокаралар давомида муҳим тиббий муолажалар нархини пасайтиришга эришилди. Беморга жами 16 босқичдан иборат кимётерапия курси тайинланган.
Мазкур вазиятнинг гуманитар жиҳатига ҳам алоҳида эътибор қаратилди. Қайд этилишича, ватандошимиз узоқ вақт, қарийб етти йил давомида Андижон шаҳрида истиқомат қилувчи онаси билан кўриша олмаган. Дипломатик миссия кўмагида сотиб олинган авиачипта ҳисобидан онанинг Тошкент–Пекин–Тошкент йўналиши бўйича сафари ташкил этилиб, қадрдонларнинг узоқ кутилган учрашуви таъминланди.
Дипломатик ваколатхона ходимлари фуқаронинг аҳволидан хабар олиш ва уни маънан қўллаб-қувватлаш мақсадида унинг яшаш ва даволаниш жойига ташриф буюрди.
Шу билан бирга, Хэбэй провинциясида Хитой фуқароларига турмушга чиққан ўзбекистонлик аёллар билан ҳам алоҳида учрашув ташкил этилди. Тадбирда 20 нафарга яқин аёл иштирок этиб, уларга Ўзбекистонда амалга оширилаётган ислоҳотлар, хотин-қизларни ижтимоий ҳимоя қилиш борасидаги чора-тадбирлар ҳақида маълумот берилди.
Дипломатлар хориждаги Ўзбекистон фуқароларининг ҳуқуқ ва манфаатларини ҳимоя қилиш, хотин-қизларни манзилли қўллаб-қувватлаш, шунингдек, уларнинг ижтимоий мослашуви ва бандлигига кўмаклашиш масалалари доимий назоратда эканини таъкидлади.
