Йиғилишда Беларус, Қозоғистон, Қирғизистон, Россия, Тожикистон ва Ўзбекистоннинг туризм соҳасига масъул идоралари, шунингдек, МДҲ Ижроия қўмитаси ҳамда МДҲга аъзо давлатлар Парламентлараро Ассамблеяси Кенгаши Котибияти вакиллари қатнашди.
Кун тартибидан МДҲ давлатларида туризмни ривожлантириш тенденциялари ва истиқболли лойиҳалар, 2021–2030-йилларга мўлжалланган Туризм соҳасида ҳамкорликни ривожлантириш стратегиясининг амалга оширилиши, туристик оқимларни статистик ҳисобга олиш ва прогнозлаш, кадрлар тайёрлаш, шунингдек, соҳадаги ўзаро ҳамкорликни янада кенгайтириш масалалари ўрин олди.
Йиғилишда ўзаро туристик оқимлар тўғрисидаги статистик ва таҳлилий маълумотларни мунтазам алмашиш механизмларини такомиллаштириш масаласига алоҳида эътибор қаратилди. Жумладан, МДҲ давлатларининг туризм соҳасидаги ваколатли органлари ўртасида маълумот алмашинувини йўлга қўйиш ҳамда миллий рақамли платформалар ахборот ресурсларини интеграция қилиш имкониятлари муҳокама қилинди.
Шунингдек, йиғилиш доирасида Самарқанд шаҳридаги "Ипак йўли" туризм ва маданий мерос халқаро университетининг МДҲга аъзо давлатларнинг туризм соҳасидаги таянч ташкилоти сифатидаги фаолияти алоҳида муҳокама қилинди.
Мазкур масала юзасидан Ўзбекистон Республикаси Туризм қўмитаси раиси ўринбосари Санджар Таджиев маъруза қилиб, университетнинг бугунги фаолияти, халқаро ҳамкорлиги, таълим ва илмий дастурлари, шунингдек, МДҲ давлатларининг соҳавий олий таълим муассасалари ўртасидаги ҳамкорликни ривожлантириш бўйича амалга оширилаётган ишлар ҳақида маълумот берди.
Кун тартибидаги муҳим масалалардан бири Кенгашга навбатдаги раисликни белгилаш бўлди. Белгиланган ротация тамойилига мувофиқ, 2026–2027-йиллар даврида МДҲга аъзо давлатларнинг Туризм бўйича кенгашига раислик Ўзбекистон Республикасига ўтди ва Туризм қўмитаси раиси Абдулазиз Аққулов Кенгаш раиси этиб белгиланди. Шунингдек, Кенгашнинг 2027-йилдаги навбатдаги йиғилишини Ўзбекистон Республикасида ўтказиш бўйича қарор қабул қилинди.
Ўзбекистоннинг Кенгашдаги раислиги даврида трансчегаравий туризмни ривожлантириш, туристик статистика ва таҳлилий маълумотлар алмашинувини такомиллаштириш, соҳада малакали кадрлар тайёрлаш, таълим муассасалари ўртасидаги ҳамкорликни мустаҳкамлаш ҳамда қўшма туристик йўналишларни ривожлантириш масалаларига алоҳида эътибор қаратилади.
Ушбу йўналишлардаги ҳамкорлик МДҲ доирасида туризм соҳасидаги амалий алоқаларни янада кенгайтириш, ўзаро тажриба алмашиш ва янги қўшма ташаббусларни илгари суришга хизмат қилади.
