“Германия Федератив Республикасининг Ўзбекистондаги Фавқулодда ва Мухтор элчиси этиб тайинланган Маттиас Фоллерт жанобларидан ишонч ёрлиқлари нусхаларини қабул қилдик, – деб ёзди Ўзбекистон ТИВ раҳбари ўзининг telegram-каналида. – Германияни Европадаги ишончли ва вақт синовидан ўтган ҳамкорларимиздан бири сифатида юксак қадрлаймиз. Сўнгги йилларда олий даражадаги ташрифлар ҳамда мунтазам сиёсий мулоқотлар туфайли Ўзбекистон–Германия муносабатлари изчил ривожланиб бормоқда.
Учрашувда икки томонлама кун тартибидаги долзарб масалаларни муҳокама қилиб, олий даражада эришилган келишувларни ўз вақтида ва сифатли амалга ошириш муҳимлиги таъкидланди.
Элчи жанобларига Ўзбекистондаги масъулиятли ва шарафли фаолиятида улкан муваффақият тилаймиз”.
Ўзбекистон ва Германия ўртасида дипломатик муносабатлар 1992 йил 6 мартда ўрнатилган.
Элчи Маттиас Фоллерт 2020–2024 йилларда Германиянинг Тошкентдаги элчихонасига раҳбарлик қилган Манфред Ҳутерернинг ўрнини эгаллади.
Бир кун аввал ГФР элчихонасининг интернет-ресурсларида янги элчининг ўзбек тилидаги мурожаати эълон қилинди. Унда элчи Германия ва Ўзбекистон ўртасидаги муносабатларни янада мустаҳкамлаш ниятида эканини маълум қилган.
