Сайёр судлар жорий йилнинг 3 ноябрь куни туман прокуратураси, Мажбурий ижро бюроси, ички ишлар органлари ҳамда жиноят ишлари бўйича туман суди ҳамкорлигида ташкил этилди.
Суд жараёнлари якунига кўра, яна 3 нафар қарздор алимент бўйича жами 108,5 миллион сўм қарзини тўлиқ тўлади. Икки нафар шахс оилавий ярашувга эришгани сабабли уларга оид ижро ишлари тамомланди. Уч нафар қарздорга эса тўловларни амалга ошириш учун муддат берилди.
Шунингдек, яна бир қарздор ота суд жараёнида 26,7 миллион сўм алимент қарзини тўлиқ тўлагани сабабли унга нисбатан маъмурий иш тугатилди.
Маълум қилинишича, Чилонзор туманида жорий йилнинг 10 ойида алимент ундируви билан боғлиқ 3 274 та ижро ҳужжати бўйича иш олиб борилган. Уларнинг 764 таси доирасида қарздорлардан 43,1 миллиард сўм алимент ундириб берилган.
