Афв этилганларнинг 604 нафари жазодан тўлиқ озод қилинади, 115 нафари эса жазони ўташдан муддатидан илгари шартли озод қилинади.
Бу ҳақда "Ўзбекистон 24" телеканалидаги "Ахборот" дастурида маълум қилинди.
Шунингдек, 52 нафар шахсга тайинланган жазо енгилроқ жазо билан алмаштирилади, 81 нафар маҳкумнинг озодликдан маҳрум қилиш жазоси муддати қисқартирилади.
Афв этилганлар орасида 7 нафар чет эл фуқароси, шунингдек, тақиқланган ташкилотлар фаолиятида қатнашган 63 нафар шахс ҳам бор.
Шунингдек, афв этилганларнинг 375 нафари ёшлар, 49 нафари аёллар, 37 нафари эса 60 ёшдан ошган эркаклардир.
Президент фармони Ўзбекистон мустақиллигининг 35 йиллиги арафасида жазо муддатини ўтаётган, қилмишига пушаймон бўлган ва тузалиш йўлига ўтган шахсларга нисбатан инсонпарварлик тамойиллари асосида қабул қилинди.
