Мамлакатимизда аҳоли саломатлигини муҳофаза қилиш, дори воситаларининг қонуний муомаласини таъминлаш ҳамда кучли таъсир қилувчи дори воситаларининг ноқонуний реализациясига қарши курашиш борасида тизимли чора-тадбирлар амалга оширилмоқда.
Жумладан, олинган тезкор маълумотларга асосан, Қашқадарё вилояти божхона бошқармаси Контрабандага қарши курашиш бўлими ходимлари томонидан вилоят Ички ишлар бошқармаси ҳамда Д.Х.Х ходимлари билан ҳамкорликда Қарши шаҳрида кучли таъсир қилувчи дори воситаларининг ноқонуний реализациясига қарши йўналишда тезкор тадбир ўтказилди.
Тезкор тадбир давомида Қарши шаҳрида яшовчи омбор мудири тадбирга жалб қилинган шартли харидорга 6 миллион сўм эвазига 6 000 дона “Бензонал” номли кучли таъсир қилувчи дори воситаларини сотаётган вақтида тадбир иштирокчилари томонидан тўхтатиб қолинди.
Шундан сўнг, мазкур шахснинг иш жойидаги омборхона холислар иштирокида кўздан кечирилди.
Кўздан кечириш жараёнида омборхонада келгусида ноқонуний реализация қилиш мақсадида сақланаётган 108 қути, жами 5 400 дона “Бензонал” номли кучли таъсир қилувчи дори воситалари ҳамда ёрлиқлари олиб ташланган 271 дона “Тропикамид” номли кучли таъсир қилувчи дори воситалари мавжудлиги аниқланди.
Тезкор тадбир давомида жами 11 671 дона кучли таъсир қилувчи дори воситалари аниқланиб, белгиланган тартибда расмийлаштирилди ва вақтинча сақловга олинди.
