Вилоят божхона бошқармаси Контрабандага қарши курашиш бўлими ходимлари томонидан вилоят Ички ишлар бошқармаси ҳамда Миллий гвардия вакиллари билан ҳамкорликда Қарши шаҳрида ўтказилган тезкор тадбир давомида "Жентра" русумли автомашина кузатувга олинди.

Мазкур автомашина "Мерседес" русумли юк автомобилидан жўнатма қабул қилаётган вақтида тўхтатилиб, холислар иштирокида кўздан кечирилди. Натижада "Жентра" автомашинасининг орқа салон қисмида 2 дона, "Мерседес" юк автомобилининг юкхонасида эса 3 дона картон қутида пиротехника воситалари борлиги аниқланди.

Аниқланган жами 5 та картон қутида 144 минг дона пиротехника воситаси мавжудлиги маълум бўлди. Уларнинг 86 минг 400 донаси "Питардес", 57 минг 600 донаси эса "Трения" номли пиротехника mahsulotlaridan иборат бўлиб, умумий қиймати дастлабки ҳисоб-китобларга кўра 50 миллион сўмни ташкил этди.