Тадқиқотлар Маданий мерос агентлиги ҳамда Яҳё Ғуломов номидаги Самарқанд археология институти Жанубий Сўғд археологик экспедицияси мутахассислари томонидан амалга оширилмоқда.
Қазишма ишлари Маданий мерос агентлиги томонидан Амир Темур фаолияти билан боғлиқ ёдгорликларни ўрганиш лойиҳаси доирасида молиялаштирилган.
Тадқиқотларнинг асосий мақсади ёдгорликнинг сақланиб қолган меъморий қисмларини очиш, саройнинг тузилиши ва қурилиш хусусиятларини аниқлаш ҳамда археологик топилмаларни илмий жиҳатдан ўрганишдан иборат.
Қазишмалар давомида тарихий қатламлар очилиб, сарой мажмуасига оид меъморий қолдиқлар ва турли археологик ашёлар аниқланмоқда. Топилмалар мутахассислар томонидан қайд этилиб, уларнинг тарихий ва илмий аҳамияти ўрганилмоқда.
Занжир Сарой XIV асрда Чиғатой улуси даврида бунёд этилган ва кейинчалик Амир Темур тасарруфига ўтган йирик қароргоҳлардан бири ҳисобланади. Тарихий маълумотларга кўра, мажмуа қарийб 16 гектар майдонни эгаллаган.
Мутахассислар олиб бораётган тадқиқотлар ёдгорликнинг илгари номаълум бўлган жиҳатларини аниқлаш, унинг меъморий қиёфасини илмий асосда тиклаш ва тарихини янада чуқурроқ ўрганишга хизмат қилади.
