Самарқанд археология институти ходимлари томонидан олиб борилаётган тадқиқотлар жараёнида ибодатхона қолдиқлари орасидан мазкур ноёб топилма аниқланган.
Мутахассисларга кўра, ҳайкалнинг юз тузилиши, соч турмаги ва бошқа иконографик хусусиятлари қадимги Сўғд санъатининг ўзига хос жиҳатларини ўрганишда муҳим манба бўлиб хизмат қилади. Топилма Қўрғонтепа ибодатхонасининг диний-бадиий безаги ва ўша давр санъати ҳақида янги маълумотлар бериши мумкин.
Қазишмалар давомида аниқланган хоналар қолдиқлари ва бошқа археологик ашёлар ибодатхонанинг ички тузилиши, вазифаси ҳамда бу ерда ўтказилган диний маросимларни ўрганиш имконини бермоқда.
Ўзбекистон Республикаси Маданий мерос агентлиги директорининг биринчи ўринбосари Элмурод Нажимовнинг таъкидлашича, 2027 йилдан бошлаб ҳар йили археологик тадқиқотларни, хусусан, ёш археологлар лойиҳаларини қўллаб-қувватлаш учун 25 миллиард сўм миқдорида грантлар ажратилади.
Қайд этилишича, 2024 йилда ҳам Қўрғонтепадаги мазкур ибодатхона қолдиқларидан тўрт қўлли маъбуд тасвири акс эттирилган деворий рангтасвир, шунингдек, сопол ҳайкалга оид қўл ва оёқ қисмлари топилган.
Мутахассислар бундай топилмалар қадимги Ўзбекистон тарихи ва маданияти ҳақидаги илмий тасаввурларни янада кенгайтиришини таъкидламоқда.
