Бу Ҳукуматнинг 2026 йил 19 октябрдаги 575-сон қарорида назарда тутилган.
Қарорга мувофиқ, 2026 йил октябрь ойида Тошкент шаҳрида «Ибн Сино — Ғарб ва Шарқ фалсафий тафаккурининг буюк намояндаси» мавзусида халқаро илмий конференция ўтказиш режалаштирилган.
Шунингдек, олий тиббиёт таълим ташкилотлари, илмий марказлар, кутубхоналар ва даволаш-профилактика муассасаларида илмий-амалий анжуманлар, кўргазмалар ҳамда очиқ маърузалар ташкил этилади. Хорижий мамлакатларга илмий экспедициялар уюштириш ва алломанинг чет элларда сақланаётган қўлёзмаларини жамлаш ҳам белгиланган.
Олимнинг «Мўъжаз ал-Қонун», «Қонунча», «Ал-Ишорат ва ат-танбиҳот», «Донишнома», «Китоб аш-Шифо» ва «Шарқ фалсафаси» асарларини ўзбек тилига таржима қилиш, уларнинг босма ва электрон нашрларини тайёрлаш кўзда тутилган.
Бундан ташқари, «Ибн Сино» халқаро мукофотини таъсис этиш режалаштирилмоқда.
Қарор билан Бухоро давлат тиббиёт институти ҳузурида давлат муассасаси шаклида Абу Али ибн Сино илмий-тадқиқот марказини ташкил этиш тўғрисидаги таклиф ҳам маъқулланган.
Марказнинг асосий вазифалари қуйидагилардан иборат бўлади:
- Ибн Сино тиббиётига оид тадқиқотлар ўтказиш ва уларнинг натижаларини замонавий табобатда қўллаш;
- аллома асарларининг қўлёзмаларини жамлаш, ўзбек тилига таржима қилиш ва уларнинг электрон платформасини яратиш;
- тиббиёт ходимлари ҳамда тиббиёт тарихи билан қизиқувчилар учун ўқув курслари ва маҳорат дарсларини ташкил этиш.
Марказ Бухоро давлат тиббиёт институтининг бюджетдан ташқари маблағлари, халқаро молия институтлари грантлари, пулли хизматлардан тушадиган маблағлар, ҳомийлик хайриялари ва қонунчиликда тақиқланмаган бошқа манбалар ҳисобидан молиялаштирилади.
