Мазкур ҳужжат 30 июль куни Ўзбекистон Республикаси Президенти Шавкат Мирзиёев ва Қирғиз Республикаси Президенти Садир Жапаров ўртасида ўтказилган музокаралар якунлари бўйича имзоланди. Икки томонлама ҳужжатларни алмашиш маросими давлат раҳбарлари иштирокида бўлиб ўтди.
Баённома икки давлат фуқароларининг ўзаро сафарлари тартибини янада либераллаштириш, қўшни давлат ҳудудида бўлиш қоидаларини соддалаштириш ҳамда туризм, чегарадош ҳудудлар ҳамкорлиги, савдо, ишбилармонлик алоқалари ва гуманитар ҳамкорликни ривожлантириш учун янада қулай шароитлар яратишга қаратилган.
Ҳужжатга мувофиқ, Қирғизистон ва Ўзбекистон фуқаролари давлат чегарасини кесиб ўтган кундан бошлаб 15 сутка давомида қабул қилувчи давлатнинг ваколатли органларида доимий ва (ёки) вақтинчалик рўйхатдан ўтиш мажбуриятидан озод этилади.
Мазкур янгилик ўзаро туристик оқимнинг янада ортишига қўшимча туртки беради. Сафарнинг дастлабки икки ҳафтасида рўйхатдан ўтиш талаб этилмаслиги сайёҳларга туристик, оилавий ва хизмат сафарларини янада эркин режалаштириш имконини яратади. Бу эса Марказий Осиёда минтақавий туризм жадал ривожланаётган бугунги шароитда алоҳида аҳамият касб этади.
Қирғизистон Ўзбекистонга энг кўп сайёҳ юборувчи мамлакатлардан бири ҳисобланади. 2026 йилнинг биринчи ярмида Ўзбекистонга 1,9 миллионга яқин Қирғизистон фуқароси ташриф буюрди. Бу кўрсаткич Қирғизистонни мамлакатнинг етакчи туризм бозорларидан бирига айлантирмоқда.
