Фермер хўжалиги раҳбарининг айтишича, жорий йил 4 апрель куни майдонларга «Хитой 87» навли пахта қўшқатор усулида экилган. Натижада далалардан 100 фоиз ниҳол олинган.
Шундан сўнг экинларга агротехник талаблар асосида ишлов берилган. Жумладан, микроэлементлардан бор кислотаси ва ачитқи (дрожа)дан фойдаланилган. Ўсимликларда 10–12 та кўсак шакллангандан кейин эса ҳар гектар майдонга 2 килограммдан этифон сепилган.
Этифон қўлланилганидан кейин дефолиация ишлари амалга оширилган. Фермер хўжалигида қишлоқ хўжалиги мутахассислари ва вазирлик тавсияларига мувофиқ агротехник тадбирлар изчил олиб борилган.
Фермернинг таъкидлашича, аввалги йилларда хўжаликда гектаридан ўртача 30–40 центнердан пахта ҳосили олинган. Бу йил эса ушбу кўрсаткични 70–80 центнерга етказиш мақсад қилинган.
— Илгари этифондан фойдаланмасдик. Бу йил қўллаб кўрдик ва натижасини далада кўриб турибмиз. Ниятимиз — гектаридан 70–80 центнер, имкони бўлса, 80 центнер пахта олиш, — дейди фермер хўжалиги раҳбари.
Айни пайтда хўжаликда десикация ишлари ҳам бажарилган.
Навоийда бугун шундай мўл ҳосил етиштирилмоқда. Даладаги пахта кўсакларининг йириклиги ва тўлалиги эса агротехник тадбирларнинг натижасини яққол намоён этмоқда.
Фермер хўжалиги раҳбари ушбу тажрибани бошқа хўжаликларда ҳам қўллаш орқали пахта ҳосилдорлигини ошириш мумкинлигини таъкидламоқда.
