«S.S.M.S.» МЧЖга тегишли автомобилларга газ тўлдириш шохобчасига 2024 йил июнь ойида етказиб берилган табиий газ 1 куб метр учун 1500 сўмдан ҳисобланган.
Қарийб икки йил ўтиб эса газ таъминоти ташкилоти ушбу давр учун 1800 сўмлик тариф қўлланиши кераклигини билдириб, жамиятга қўшимча 50,6 миллион сўмлик ҳисоб-фактура расмийлаштирган.
Тадбиркор қўшимча ҳисоб-фактурани қабул қилмаган ва солиштирма далолатномани имзоламаган. Шунга қарамай, ушбу сумма 2026 йил апрель ойи учун тўланган аванс маблағидан ечиб олинган.
Масала Бизнес-омбудсман томонидан ўрганилганда, тариф ўзгарган вақтда жамиятда олдиндан тўланган маблағ мавжуд бўлгани аниқланган.
Ўша пайтда амалда бўлган қоидаларга кўра, тариф ўзгарганида истеъмолчининг олдиндан тўлаган газ ҳажми учун маблағи тўлов амалга оширилган кундан бошлаб кўпи билан бир ой давомида қўшимча тўловдан озод қилинган.
Муҳим жиҳати шундаки, янги таҳрирдаги қоидалар 2024 йил 10 июндан кучга кирган. Шу боис кейинроқ кучга кирган нормаларни ундан олдин юзага келган муносабатларга татбиқ этиш мумкин эмас.
Бизнес-омбудсман шу асосда «Ҳудудгаз Тошкент» газ таъминоти филиалига 50,6 миллион сўмни жамиятнинг шахсий ҳисобварағига тиклаш ва 2024 йил июнь ойи учун ҳисоб-китобларни қайта кўриб чиқиш бўйича хулоса киритган.
Натижада тадбиркорнинг ҳисобварағидан ечиб олинган 50,6 миллион сўм қайта тикланди.
Яъни, қарийб икки йил олдинги газ ҳисоб-китоби бўйича қўшимча тўлов талаб қилинган, аммо кейин кучга кирган қоида аввалги муносабатларга татбиқ этилмаган.
