Давлат комиссиясининг тегишли баёнига мувофиқ, қорақалпоғистонлик абитуриентлар учун иккита қўшимча қабул имконияти белгиланди.
Биринчи имконият
2–6 октябрь кунлари Қорақалпоғистон Республикасида доимий яшовчи, кириш имтиҳонларида 68 балл ва ундан юқори натижа кўрсатган ҳамда давлат олий таълим ташкилотларининг кундузги таълим шаклига тўлов-контракт асосида ўқишга тавсия этилган ёшлар 500 та мақсадли қабул параметри учун рўйхатдан ўтиши мумкин.
Рўйхатдан ўтиш my.uzbmb.uz сайти орқали амалга оширилади. Абитуриентлар ўзлари талаба бўлишга тавсия этилган олий таълим ташкилоти ва таълим йўналиши бўйича танловда иштирок этади.
Рўйхатдан ўтган абитуриентлар кириш имтиҳонларида тўплаган баллари юқорилиги бўйича қатъий кетма-кетлик асосида мақсадли қабул параметрлари доирасида талабаликка тавсия этилади.
Иккинчи имконият
Қорақалпоғистон Республикаси Вазирлар Кенгашининг мурожаатига мувофиқ, Билим ва малакаларни баҳолаш агентлиги томонидан вилоятлардаги давлат олий таълим ташкилотларига бакалавриат таълим йўналишлари кесимида тўлов-контракт асосида қўшимча 6 500 та қабул параметри тасдиқланди.
Мазкур қўшимча қабул параметрлари Қорақалпоғистон Республикасида абитуриент сифатида рўйхатдан ўтган, умумий ўрта, ўрта махсус ёки касбий таълим ташкилотларини тамомлаган ҳамда кириш имтиҳонларида 56,7 балл ва ундан юқори натижа кўрсатган, аммо талабаликка тавсия этилмаган абитуриентлар ҳисобидан шакллантирилади.
Танлов натижалари бўйича қайдномалар тегишли олий таълим ташкилотларига белгиланган тартибда расмийлаштириш учун етказилади.
