Соғлиқни сақлаш вазирлигининг маълум қилишича, жорий йил 1 ноябрь куни Тошкент шаҳридаги меҳмонхонада нонуштага ярим қовурилган тухум ва сосиска истеъмол қилган 20 нафар бола ва уларнинг яқинларидан 13 нафарида шу куннинг ўзида қайт қилиш, ич кетиши, қорин оғриғи ва тана ҳарорати кўтарилиши каби белгилар кузатилган.
Улар тез тиббий ёрдам хизмати орқали Республика ихтисослаштирилган эпидемиология, микробиология, юқумли ва паразитар касалликлар илмий-амалий тиббиёт марказига олиб келинган. У ерда дастлабки тиббий ёрдам кўрсатилгач, беморлар 5-сонли шаҳар юқумли касалликлар клиник шифохонасига ўтказилган.
2–3 ноябрь кунлари яна етти нафар киши ҳам шундай белгилар билан тиббиёт муассасасига мурожаат қилган.
Текширувлар натижасида шифохонага келтирилган жами 20 нафар бола ва уларнинг яқинларига «ўткир диарея» дастлабки ташхиси қўйилган. Барча беморларга белгиланган стандартлар асосида даволаш муолажалари олиб борилган.
Ҳозирда икки нафар беморга уйига жавоб берилган. Қолган 18 нафар беморнинг аҳволи барқарор ва қониқарли. Реанимация бўлимида даволанаётган беморлар йўқ. Улар юқори малакали шифокорлар кузатувида бўлиб, даволаниш учун зарур шароитлар яратилган.
Санитария-эпидемиологик осойишталик ва жамоат саломатлиги қўмитаси маълумотига кўра, беморлар истеъмол қилган озиқ-овқат маҳсулотлари қолдиқларидан намуналар олиниб, лаборатория текширувлари давом эттирилмоқда. Текширув натижалари бўйича қўшимча маълумот берилиши билдирилган.
